ب درێژاهیا دیروکا کوردان و خەبات و هەڤرکیا وان لگەل دوژمنێن وان چ ترک چ عەرەب چ فارس، هەر تم دوژمنێن کوردان ئەگەر د روبروبونا چەکداریدا سەرکەفتى نەبوبن قەستا فێلبازى و خوە ڤەدزین ژ ناڤەروک و جەوهەرێ ئارێشێ کرینە یانژى وەکو بابەتەک مروڤى رەفتار لگەل دوزا رەوایا کوردى کرینە و لێ مێزە کرینە هەلبەت ئەڤ کارەژى ب پلان و شارەزاى تێ کرن و هاتیە کرن ئانکو دوژمنێن مە ژمە پتر ره و ریچالێن دوزا کوردى دزانن و ئارمانجێن وێژى ژمە باشتر دزانن هەموو دەمان برینێن کور ل لاشێ مە کرینە داکو ب چارەسەرییەکادەمکى رازى ببین کو نە ل ئاستێ قوربانیێن گەلێ مەبە یانژى ئەو ئارمانجا مە یا سەرەکىکو رزگارکرنا گەلێ کوردە ژ داگیرکرنێ و دەردەسەریێ و خوە رێڤە برنەکا سەرفرازانە ئەڤ سیاسەتا شوفینى و ب گەمار ل هەر چار پارچێن کوردستانێ یێن داگیر کرى هاتیە بکار ئانین و بەردەوامیا وێژى هەیە هەلبەت ل باشورێ کوردستانێ نێزیک سەد سالە خەباتەک بەردەوام و پری قوربانى و مالوێرانى و دەربەدەرى یا هاتیە کرن ژبو گەهشتن ب ئارمانجا سەرەکى قوربانیێن مەزن هاتینە دان ب سەدان گوند کاڤل بوینە ... ب سەدان گەنجێن کورد هاتینە ل سێدارەدان ژبلى یێن لژێر ستەم و ئەشکەنجێ گیانێ خوە ژ دەستداین ئارمانج ژ هەموو ژەڤان قوربانیان ئەوبو کو وەکى مە خویاکرى ئەڤ گەلێ هەژار و ستەمدیتى ب بەختەوەرى و سەرفرازى د وەلاتێ خوەدا بژیت دویر ژ پوستالێن داگیرکەران دوژمنێن کوردان لهەر دەرى ڤێ مەرەم و ئارمانجێ دزانن و ب ئەنجامدانا ریفراندومێ ل باشورێ کوردستانێ ل 25/09/2017 ئەڤ ئارمانجە ب زەلالى ژبو دوست و دوژمنان ئەشکەرەبو و هەمیانژى دژاتیا خوە راگەهاندن دوژمنێن سەرەکى ئیران ترک ئێراق  پێنگاڤێن دوژمنکارێ برنە وارێ پراکتیکێ ب هێزەکا لەشکەرى و ب ئالیکاریا گروپەک خیانەتکار نیڤا خاکا کوردستانێ ب کەرکوکا دلڤە هاتە داگیرکرن و فرگەهاێن نێڤدەولتیێن کوردستانێ ب فەرمانا بەغدا هاتنە داخستن و بودجەیا کوردستانێژى ب شێوەیەک بەرچاڤ کێم کرن لێ ب گڤاشتن و گوشارێن نێڤدەولەتى و خوەراگریا گەلێ کورد ل باشورێ کوردستانێ بریارا ڤەکرنا هەردوو فرگەهان و رێکرنا برەک پارەى ژبو فەرمانبەرێن کوردستانێ .تشتێکو سەیر دبابەتیدا دەما لسەر ڤى بابەتى پرسیار ژ سەروک وەزیرێن ئێراقا بناڤ فیدرال تێ کرن ڤێ بریارێ وەکو منەتەک لسەر کوردان حساب دکە وەکو کادانەوەیەک و بەرسڤەک ژبو سەروکوەزیرێن ئێراقێ و هەموو دوژمنان سەروک مەسعود بارزانى هاتە دەنگ وفەرمووى:(کێشێن بەغدا و هەولێرێ تنێ فرگەه و بودجە نینە کێشێن هەولێر و بەغدا دیروکى .سیاسى.نەتەوەى.ئابورى و دەستورینە) بوچى سەروک بارزانى ئەڤ بەرسڤا بلەزدا ؟چونکى بارزانى باش و باش مەرەما سەروکوەزیرێن ئێراقێ و هەموو دوژمنێن کوردستانێ ب زەلالى دزانە و دزانە دخوازن دوزا رەوایا کوردى د ڤەکرنا فرگەهان و رێکرنا برەکا پارەیدا دورپێچ بکن و خەبات و جوبارێن خوینێ و کیمیا باران و ئەنفالێن رەش بێنە ژبیر کرن و بەراڤێدا بچن لێ خیالا وان یا خاڤە و گەلێ کورد ل باشورێ کوردستانێ رژدە لسەر خەباتا خوە و ئارمانجژى پێکئانین و ئاڤا کرنا دەولەتا کوردستانێ یە ئەو ئارمانجا کو نە تێتە بچیک کرن نەژى ژبیر کرن و خەباتا سەدسالیا کوردان ل باشورێ کوردستانێ و قوربانیێن وێ نە ژبو ئارمانجەکا هوسا نەبەرکەتى بو و رێبازا بەرەڤ دەولەتبونێ یابەردەوامە و ناراوەستیت