هونهر و چاندا کوردی ب گشتی و ب تایبهتی ستران و سرودێن سیاسی و نهتهوهیی،ژ لایێ داگێرکهر و کۆلۆنیالست،و مێتینگهر،و ئانتی مرۆڤاهیێ ڤه ب ههموو ئاوایێن خۆ ڤه کهفتبوون ژێر گهفێن مرن و قهدهغهکرنێ.
وهکه چهوا ناڤێ کوردستانا دایک و پێشمهرگه و تێکۆشهرێن ئازادی و ئاشتی و دهمۆکراسیێ د قهدهغهبوون،ب ڤی رهنگی هونهرێ کوردی ژی د هاته قهدهغهکرن.و ب روومهتا گهلێ مه د لهیستن،و نه دهێلان ب ئازادی و سهربهستی گهلێ مه ب هونهر و چاند و ئاوازێن خوه شاببن.و ئهو هونهرێ د هاته وهشاندن و ئازاد ژی ژ ناڤهرۆکا وێ یا راستهقین هاتبوو دوورخستن،و ب دههان کهسێن ب نهژاد کورد ئیرادهیا خوه رادهستی دووژمن و داگێرکهرێن ئاشتی و ئازادی و دهمۆکراسیێ کربوون،ببوونه نوکهر و خزمهتکارێن هونهر و چاندا داگێرکهران،و دگهل هندێ ژی میراسێ هونهرێ رهسهنێ کوردی ئهوێ ب سایا دایکێن کورد و د ناڤا جڤاکا کوردی یا رهسهن و کوردپهروهران دا ب ئێش و ئازارێن گران هاتین پاراستن.بۆ چهند قوریشهکان دگهل کهساتیا خۆ یا لاواز و ترسنووک کرنه قوربانێ زۆردار و داگێرکهران و حهتا ئیرۆژی ئهڤ کهسێن خوه فرۆتیین ل سهر خزمهتکرنا خوه بۆ ئانتی کورد و کوردستانێ د بهردهوامن.
لێ ل ههمبهری ڤێ ئاسملاسیۆن زۆرداری و تالانکرنێ،تێکۆشهر و خوهگۆریکهرێن چاند و هونهر و دۆزا رهوایا گهلێ مه ژی وهک جانفهدا و پێشمهرگهی ههر دهم د چهپهرێ خوهگۆریکرن و بهرخوهدانێ دا بوونه.
ههلبهت یهک ژ ڤان ژی هونهرمهندێ مهزنێ گهلێ مه مامۆستا شڤان پهروهر بوو،و یهکه ژ پێشهنگێن هونهرمهندێن تێکۆشهر و شۆرهشگێرێن گهلێ مه.کوو ههموو ژیانا خۆ تهرخانکری ژ بۆ خزمهت و پێگههاندنا هونهر و چاندا کوردی و هونهرێ کوردی ژ سهری ڤه ڤهژاندی،و کریه سهرمایهکا مهزن ژ بۆ شۆرهشێن کوردی و ب دهنگ و هونهر و سرۆدێن خوه یێن شۆرهشگێری،شۆرهشێن نوو ژ دایک دبوون ل بهر دهنگ و سرۆدێن وی د هاتنه فرشکرن،و گۆڤهندا سهرخوهبوون و ئازادیێ ل بهر د هاته ههژاندن.و پێشمهرگه و شهرڤانێن کورد ل بهر دهنگێ پهروهری ئاگرێ ئازادیێ ڤێتێخستن.و گولهیێن سهرخوهبوون رزگاریێ ب کهلا دلێ پهروهری د باراندن سهرسهرێ دووژمن و داگێرکهران،تێکۆشهرێن د زندانێن داگێرکهران دا ههر ل بهر دهنگێ مامۆستا شڤان پهروهری دکاریان ل ههمبهری ئیشکهنجهیا جهلادێن وهلاتێ مه پارچهکرین،ب سهربلندی ل بهرخوه بدهن حهتا دگههشتن کاروانێ گۆریکهرێن ئازادیێ.
بێگومان چوو مالێن کوردپهروهران نهمابوون کو دهنگێ مامۆستا شڤان پهروهری نهگههیتێ و باندۆرا خۆ لێ نهکهت،و من ب خۆ ژی د تهمهنێ ( 5 ) سالی دا،ل ( 1978 ) ل دهڤهرا جۆلهمێرگێ کو وێ دهمێ بابێ من ئهو پێشمهرگه بوون و ههردهم کاسێتێن پهروهری ل گهل ههبوون،بۆ جارا یهکێ ژ دهنگێ مامۆستا شڤان پهروهری و خانما وی خۆشکا گولستان پهروهر ناڤێ کوردستانێ فێربووم.و ل بهر دهنگێ وان مهزن بووم.ئانکوو هونهرێ پهروهری کاریا د گشت واران دا باندۆرهکا ئهرێنی ل جڤاکا کورد بکهت.و د ههمان دهم دا بۆ خهنجهرهک د دلێ دووژمنێن ئازادیێ دا.ژ بهر وێ یهکێ هونهر و سرۆدێن مامۆستا پهروهری ژ ئالیێ ههر چار داگێرکهرێن کوردستانێ ڤه هاتنه بهربهندکرن و قهدهغهکرن.
ب دههان ئازادیخواز و کوردپهروهران ژی ژ بهر گوهداریکرنا پهیاما وی یا پیرۆز،و هشیارکرنا گهلێ ژێر دهست.د هاتنه گرتن و گیانێ وان یێ پیرۆز د کهفته ژێر گرانتین ئیشکهنجهیا هۆڤانه حهتاکوو دگههشتنه کاروانێ نهمران.گهلهک تێکۆشهرێن گهلێ مه وهسیهت دکرن دهما ژیانا خوه درێکا سهرخوهبوون و ئازادیێ دا ژ دهست بدهن.ل سهر تابووت و تهرمێ وان سرۆد ب دهنگێ پهروهری بێن خوهندن.ب ڤی رهنگی مامۆستا شڤان پهروهر کاریا وهکه پێشهنگ د شۆرهش و سهرهلدان و بهرخوهدانان دا ل بهرامبهری دووژمن و داگێرکهران ب سهرهکی بلند سهربکهڤیت.و تاجا سهرکهفتنێ دهینته سهر سهرێ گهلێ خوه.و پهیاما نهتهوهیا مهزلووما گهلێ بن دهست بگههینته دهف دۆست و نهیاران،و ناڤێ خوه ب تیپێن زێرین د دیرۆکا کوردستان و مرۆڤاهیێ دا ب جیه بکهت.و تهختێ رایهدارێن داگێرکهرێن کوردستانێ ب ههژینیت،و نهچار بکهت کو کهسێن وهک سهرۆک کۆمار و سهرۆک وهزیرێن ترکیێ گول و ئهردۆغان د ناڤا پارلهمهنتۆ و دلێ ترکیێ دا بێژن ما کی مایه گوهداریا غهزال غهزال و ههلهبچهیا شڤان پهروهری نهکری؟ما پهروهر ژی نه پارچهکه ژ مه و ژ ڤی وهلاتی؟ب سهرێ خوه ئهڤ گۆتنێن رایهدارێن داگێرکهران مهزناهیا مامۆستا شڤان پهروهری ب باشی ددهن خوهیاکرن.
دیسان دڤان رۆژان دا پهروهری ب کۆنسێرتا خۆ یا ئاشتیێ کو ل پایتهختێ وهلاتێ نهمسا ڤیهنا ب بهرههڤبوونا سهرۆک کۆمارێ نهمسا دۆستێ گهلێ مه ههینز فیشهر،و سهرۆکێ کوردستانێ مهسعود بارزانی.و چهندین سیاسهتڤانێن مینا ئهحمهت تورک،و میر دهنگیر فراتێ جێگرێ سهرۆکێ پارتیا دهستههلاتدار ( ئاکپارتی ) و چهندین کهساتیێن دی یێن ناسکری.د قادا کوردستان و ترکیێ و جیهانێ دا ئامدهیی وێ کۆنسێرتا ب ههیبهت بووین.ب دیتنا من ئهڤ کۆنسێرتا ئاشتیێ چهند پهیامهکێن گرنگ دگههینیت.
یا ئێکێ خوهیا دکهت، کو ههردهم پهروهری هونهرهکی نهتهوهیی بێی جوداهی پێشکێشی ههموو گهلێ خوه کریه و هونهر و خهباتا وی بۆ یهکگرتن و یهکرێزیا ههموو پارت و ئالی و سازی و رێکخستنێن کوردی بوویه.و د ههمان دهم دا پهیامهکه بۆ وان کوردێن نه د چهپهرێ کوردایهتیێ دا.و حهتا نووکه ههر ژ بۆ بهرژهوهندا خوه یا کهساتی ل سهر خوین و کهدا گهلێ کورد کارکری و نهتهوهیا خوه کری قۆربانا بهرژهوهندیا خوه.و پهیاما دی ژی ژ بۆ نهتهوه و دهمۆکراتیخوازێن ترکه،و دیاردکهت کو گهلێ کورد ههردهم ئاشتیێ ب ڤان گهلان را دخوازیت،و بهرخوهدانا نهتهوهیا کورد ژی ههر ژ بۆ وهکههڤی و براتیا ڤان نهتهوهیان بوویه.یێن رژێمێن وان وهلاتێ مه داگێرکرین.
و پهیاما داویێ ژی دیاردکهت کو هونهر و چاندا کوردی کێمتر نینه ژ ههموو هونهر و چاندێن نهتهوهیێن جیهانێ و ئهگهر ئازادیا گهلێ کورد ههبیت دێ خزمهتا ههموو مرۆڤاهیێ کهت.و فهداکاری و خهباتا نهتهوهی یا مامۆستا شڤان پهروهر شاهدا ڤێ یهکێ یه،خوهدی جههکی تایبهت بیت دناڤ دلێ گهلێ خوه دا.لێ چهندین پهیام و گۆتنێن رایهدارێن ترک ل ههمبهری مامۆستا پهروهری د نهرم و ئهرێنی بن،وێ یهکێ ناگههینن کو ئهڤه داویا ههر تشتی یه و پرسگرێکا کورد هاتیه قوناغا چارهسهرکرنێ و دڤێت پهروهر ل گازیا وان خوهدی دهرکهڤیت و بچیته ترکیێ و باکوورێ وهلاتی.
ب باوهریا من رایهدارێن ترک دخوازن پهروهری و کهدا وی یا ( 35 ) سالان ژ بۆ نهتهوهیا خوه و خاکا کوردستانێ و ئازادیا مرۆڤاهیێ کرین، بکهت کهساتی و ژ نهتهوهیا وی دوور بێخیت داکوو زێدهتر کهدا وی بکهڤیته د خانا بهرژهوهندیا وان دا و ئهو سۆدێ ژ ڤێ چهندێ وهربگرن.
ههلبهت ل بهرامبهری ڤێ چهندێ وهک حهژێکهرێ دهنگ و کهساتیا مامۆستای، پێشنیازهکا من ژ مامۆستا شڤان پهروهری را ههیه. کو ئهو ل سهر رایهدارێن حکومهتا ترکیێ بکهت مهرج حهتاکوو کهساتیێن سیاسی ژ بۆ رامان و هزرێن خوهیێن ئازاد د زندانان دابن،و رۆژانه ب دههان کهسێن ب ههمان رهنگی تێنه گرتن و بسالان دزندانێن ترکیێ دا دمینن.نههێنه ئازادکرن ئهز ناڤهگهرم ترکیێ و باکوورێ کوردستانێ.
تێبینی:ئهڤ نڤێسین ب تیپێن کوردیا لاتینی ل ههیڤا ئادارێ د مالپهرێ ئاڤهستاکوردا هاتیه وهشاندن.
Faxir_Berwari@hotmail.com
28-05-2010 Duhok
