ڤه‌ژاندنا ۳۸ سالیا کۆچا داوی یا بارزانی نه‌مر ل هۆڵه‌ندا هات کرن

Decrease font Enlarge font قەبارەی فۆنت
total views:    196
image

ژ بۆ وه‌فاداری و ڕێزگرتنا خه‌باتا بابێ نه‌ته‌وا کورد مسته‌فا بارزانی نه‌مر و بزاڤا ڕزگاریخوازیا نه‌ته‌وا کورد د چالاکیه‌ک به‌رفره‌هدا لژنه‌یا ناڤچا هۆڵه‌ندا یا پارتیا دێمۆکراتا کوردستانێ ڕۆژا یه‌کشه‌مبێ ڕێکه‌فتی ۵-۳-۲۰۱۷ باژارێ ئالمیرە ‌بیرانین و ڤه‌ژاندنا ۳۸ سالیا کۆچا داوی یا بارزانیێ نه‌مر کر..

ئه‌ڤ بیره‌وه‌ری ب ئاماده‌بوونا برێز سه‌یوان بارزانی بالیۆزێ کۆمارا ئیراقا فه‌ده‌رال ل هۆڵه‌ندا و برێز دلاوه‌ر ئاژگه‌ی نوونه‌رێ هکومه‌تا هه‌رێما کوردستانی ل یه‌که‌تیا ئه‌ئورۆپایێ و برێز ئیسمائیل ده‌له‌وی پێشمه‌رگێ دێرین یێ شۆره‌شا ئه‌یلولێ و به‌رپرسێ ناڤچا هۆڵه‌ندا د سالێن ۹۰ ده‌، نوونه‌رێن ۱۸ پارتیێن سیاسی ژ هه‌رچار پارچه‌یێن کوردستانێ و پێشمه‌رگێن دێرین یێن شۆره‌شێن ئه‌یلولا مه‌زن و گولانا پێشکه‌فتنخواز و که‌سووکارێن سه‌ربلندێن شه‌هیدان و نوونه‌ر و ئه‌ندامێن ئافره‌تان و قووتابی و لاوان و ژماره‌یه‌ک به‌رچاڤ یا ڕه‌ڤه‌ندا کورد ژ وه‌لاتێ هۆڵه‌ندا، ئه‌لمانیا و به‌لچیکا ئه‌ڤ بیره‌وه‌ری برێڤه‌چوو.

ده‌ستپێکرنا بیره‌وه‌ریێ ب ده‌قیقه‌یه‌ک ڕاوه‌ستان سه‌ر پیان ژ بۆ ڕێزگرتنا خوینا شه‌هیدێن ڕێیا ئازادی و سه‌رخوه‌بوونا کوردستانێ و سه‌روه‌رێ نه‌مران مسته‌فا بارزانی و کاک ئدریسێ هه‌رده‌م زیندی و ل گه‌ل گۆتنا سروودا نه‌ته‌وا کورد ئه‌ی ڕه‌قیب جڤینێ ده‌ستپێکر.

په‌یڤا بخێرهاتنێ ل سه‌ر ناڤێ کۆمیتا ئاماده‌کار ژ ئالیێ برێز دیندار کۆچه‌ر کاگێر و به‌رپرسێ ڕاگهاندنا ناڤچا هۆڵه‌ندا ڤه‌ هاته‌ کرن و د ئاخفتنا خوه‌ ده‌ بخێرهاتنا مێڤانان کر گۆت: هه‌ر سال ئه‌م ڤێ بیرانینێ دکن و ڕێزگرتن ل وه‌فاداریه‌که‌ بۆ وێ خه‌باتا بێ ڕاوه‌ستان و قووربانیدانا بارزانیێ نه‌مر و هه‌رده‌م ڤێ بیرانینێ‌ ڕووحا کوردایه‌تیێ وه‌ک ئاگرێ نه‌ورۆزێ دلێ مه‌ گه‌رم و گه‌ش دکەت.
هه‌ر وه‌سان پیرۆزباهیا خه‌لکێ کوردستانێ کر ب هه‌لکه‌فتنا ٢٦ سالیا ده‌ستپێکا سه‌رهلدانا باشوورێ کوردستانێ کۆ ل باژارێ ڕانیایێ ده‌ستپێکری ل ڕێکه‌فتی ۵-۳-۱۹۹۱.

یه‌که‌م گۆتارا جڤینێ ژ ئالیێ برێز ئۆمه‌ر زاویته‌یی به‌رپرسێ لژنه‌یا ناڤچا هۆڵه‌ندا هات پێشکێشکرن، بابه‌تێ گۆتارا برێز ئۆمه‌ر زاویته‌یی ب ناڤنیشانێن: بارزانی نه‌مر کی بوو و چه‌وا ژ سه‌رکردێن دن یێن کورد تێ جووداکرن و چه‌وا و بۆچی خه‌بات دکر، ناڤه‌رۆک و ده‌ستکه‌فتێن وێ خه‌باتێ چ بوون؟ و بۆچی بارزانی نه‌مره‌؟ هه‌ر وه‌سان گۆت: ئه‌ڤه‌ چه‌ند پرسیاره‌کێن که‌ڤنن لێ پێویستی ب به‌رسڤێن نوو هه‌یه‌. برێز ئۆمه‌ر زاویته‌یی ب هووری تیشک ئێخسته‌ سه‌ر ژیانا بارزانیێ نه‌مر ژ ڕۆژا ژ دایکبوونێ وی هاته‌ کۆچا داوی کری ل ئامه‌ریکایێ ل ڕێکه‌فتی ۱-۳-۱۹۷۹، به‌هسکرنا بارزانیێ نه‌مر ژ دوو ئالیێن ئاکاده‌میک ڤه‌ هات به‌هسکرن، ژ ئالیێ مێژۆی جێئۆپۆلیتیکی و که‌لتووری ناسیۆنالیستی.

گۆتارا نوونه‌رتیا هکومه‌تا هه‌رێما کوردستانێ ل یه‌که‌تیا ئه‌ئورۆپایێ ژ ئالیێ برێز دلاوه‌ر ئاژگه‌ی ڤه‌ هات خوه‌ندن و د گۆتارا خوه‌ ده‌ به‌هسێ ڕێبازا بارزانی نه‌مر هات کرن و هه‌ر وه‌سان ڕه‌وشا نها یا کوردستانێ تێدا ده‌رباس ببت.

ئاکاده‌مسیێن و هه‌لبه‌ستڤانێ کورد برێز ئه‌دیب چه‌لکی کۆ ژ ئالمانیا تایبه‌ت هاتبوو ڤه‌خوه‌ندن سێمیناره‌کێ ئاکاده‌میک ل سه‌ر ڕێبازا بارزانیێ نه‌مر پێشکێشکر ب ناڤێ: ڕێبازا بارزانی، پێناسه‌ و شرۆڤه‌کرن.
سێمینارا برێز ئه‌دیب چه‌لکی ژ سێ (۳) خالان پێکهاتبوو ۱. خه‌باتا نه‌ته‌وی ۲. گۆتنێن بارزانی و ۳. کریارێن بارزانی، ب ڕه‌گه‌کێ پێکۆل ل سه‌ر ڤان هه‌رسێ خالان به‌هسێ ڕێبازا بارزانی نه‌مر.
هه‌ر وه‌سان به‌هسێ به‌رهه‌مێ خوه‌ یێ نوو کر ب ناڤێ "کاروانێ پیرۆز" کۆ ل سه‌ر کاروانێ بارزانێ نه‌مره‌ ده‌ما ژ کۆمارا کوردستانێ به‌ر ب سۆڤیه‌تا به‌رێ چووی، هه‌لبه‌ست یا برێز ئه‌دیب چه‌لکی یه‌ و ئاواز یا هه‌سه‌ن شه‌ریفیه‌ و گۆت ئه‌ڤ به‌رهه‌م یێ د قۆناخا داوییێ ده‌ و دێ به‌لاڤه‌ بت.
د داویێ ئاخفتنا خوه‌ ده‌ هه‌لبه‌ستا کاروانێ پیرۆز بۆ مێڤانێن سێمینارێ پێشکێشکر و خوه‌ند.

ل سه‌ر ناڤێ مالا ئێزدیان ل هۆڵه‌ندا برێز هه‌سوو هوورمی په‌یڤه‌ک پێشکێش کر و د په‌یڤا خوه‌ ده‌ گۆت: ۱ئێ ئادارێ ڕۆژه‌کا خه‌مگینه‌ بۆ مله‌تێ کورد ب ته‌ڤای، ئارمانجا بارزانی نه‌مر ئازادکرنا مرۆڤان بوو. بارزانی نه‌مر پشته‌ڤانێن ئۆلێن جوودا جوودا بوو ل کوردستانێ .
هه‌ر وه‌سان که‌یفخوه‌شیا خوه‌ ده‌ربری کۆ پدک سه‌رده‌ریه‌کا نوو نها بۆ ئێزدیان دکت پشتی کۆمکوژیان ئێزدیان.
برێز هه‌سۆ هوورمی گۆت: برێز میر ته‌هسین به‌گ ڤان ڕۆژان ڤه‌گه‌ریایه‌ کوردستانێ کۆ یه‌کرێزیا مله‌تێ کوردان بپارێزت. هه‌ر وه‌سان برێز هازم ته‌هسین به‌گ کۆ وه‌کیلێ میری گۆتیه‌ باشترین نوونه‌ر بۆ ئێزدیان سه‌رۆک بارزانیه‌.
برێز هه‌سۆ هوورمی ب دلگرانی گۆت ب مخابنی ڤه‌ ڤان ڕۆژان پێشبینیا شه‌رێ براکووژیێ ل شنگالێ تێ کرن و گۆت ڤان ڕۆژان جڤاتا ڕۆهانی یا ئێزدیان به‌یانه‌ک ل سه‌ر ڤێ ڕه‌وشا نها یا شنگالێ ده‌رخستیه‌ و سپاسیا وان که‌سان کریه‌ ئه‌وێن د هاوارا ئێزدیان هاتین د ده‌مێن ته‌نگاڤ ده‌ و هه‌ر وه‌سان داخواز ژ پککێ کرنه‌ ژ شنگالێ ده‌رکه‌ڤن.
هه‌ر وه‌سان گۆت: ئه‌م داخواز دکن شنگال ببه‌ پارێزگه‌هه‌ک سه‌ر ب هه‌رێما کوردستانێ ڤه‌.
هه‌بوونا پککێ و هه‌شدا شه‌بی دێ ببه‌ سه‌به‌بێ نه‌ئارامیه‌کا به‌رده‌وام ل وێ ناڤچێ.
داخوازا ئێزدیان ئه‌وه‌ کۆ شنگال ببه‌ پارێزگه‌هه‌ک سه‌ر ب هه‌رێما کوردستانێ ڤه‌ و ئه‌و خوه‌ ڕێبه‌ریا خوه‌ بکن.

گۆتارا هه‌ڤکاری یا پارتیێن سیاسی ژ هه‌ر چار پارچه‌یێن کوردستانێ ل هۆڵه‌ندا کۆ ژ ۱۸ پارتیان پێک تێ ژ ئالیێ برێز هه‌سه‌ن مه‌جیدی هات خوه‌ندن و د گۆتارا خوه‌ ده‌ ڕۆناهی ئێخیسته‌ سه‌ر خه‌بات و قووربانیدانا بارزانی نه‌مر ل هه‌ر چار پارچه‌یێن کوردستانێ.

هه‌لبه‌ستڤانێن کورد له‌تیف ئۆمه‌ر و سه‌یدایێ دلبرین د هه‌لکه‌فتنا کۆچا داوی یا بارزانی نه‌مر چه‌ند هه‌لبه‌ستێن خوه‌ ل سه‌ر بارزانی نه‌مر پێشکێشکرن.
هونه‌رمه‌ندێن شێوه‌کار ئه‌رکان جاف دوو (۲) تابلۆیێن شێوه‌کاری چێکربوون، یه‌ک ژ وانا یێ بارزانی نه‌مر بوو و یێ دن یێ کاک ئیدریس بارزانی جانه‌مه‌رگ بوو کۆ ژ ئالیێ برێز سه‌یوان بارزانی و دلاوه‌ر ئاژگه‌ی په‌رده‌ ل سه‌ر هات ئاڤێتن.
هونه‌رمه‌ند سه‌لاح سلێڤانه‌ی تابلۆیه‌کا بارزانی نه‌مر چێکر بوو و پێشکێشی برێز سه‌یوان بارزانی کر.

هه‌ر وه‌سان چه‌ند برووسکه‌ هاتن خوه‌ندن یێن ئۆفیسا ئه‌ئورۆپا یا یه‌که‌تیا ئافره‌تێن کوردستانێ، ئه‌نجوومه‌نێ هۆڵه‌ندا یێ یه‌که‌تیا ئافره‌تێن کوردستانێ و یه‌که‌تیا قووتابی و لاوێن کورد ل هۆڵه‌ندا، د ڤان برووسکه‌یان ده‌ خه‌بات و به‌رخوه‌دانا بارزانی نه‌مر بلند نرخاندن.
ئه‌ڤ یاد و بیره‌وه‌ری وه‌ک هه‌رسال کۆ لژنه‌یا ناڤچا هۆڵه‌ندا ساز دکت ب هه‌ڤکاریا دلسۆزێن ڕێبازا پیرۆزا بارزانی نه‌مر ب سه‌رکه‌فتی هات ئه‌نجامدان.

لژنه‌یا ناڤچا هۆڵه‌ندا
پارتیا دێمۆکراتا کوردستانێ
۵-۳-۲۰۱۷