سەرۆك بارزانی لە گوێر سوپاسی گیانفیدایی و خۆڕاگریی پێشمەرگەی كرد

Decrease font Enlarge font قەبارەی فۆنت
total views:    956
image

ئەمڕۆ (سەرۆک بارزانی)  بە مەبەستی لە نزیكەوە ئاگاداربوون لە بارودۆخی مەیدانیی بەرەكانی ڕووبەڕووبوونەوەی تیرۆریستان لە میحوەری گوێڕ و بەسەركردنەوەی هێزی پێشمەرگە لەم میحوەرەدا سەردانی گوێڕی كرد و سوپاسی گیانفیدایی و خۆڕاگریی پێشمەرگەی كرد.

ئەمڕۆ سێشەممە 13ـی 1ـی 2015 سەرۆكی هەرێمی كوردستان (مەسعود بارزانی) بە مەبەستی لە نزیكەوە ئاگاداربوون لە بارودۆخی مەیدانیی بەرەكانی ڕووبەڕووبوونەوەی تیرۆریستان لە میحوەری گوێڕ و بەسەركردنەوەی هێزی پێشمەرگە لەم میحوەرەدا سەردانی گوێڕی كرد.
لەم سەردانەدا (سەرۆك بارزانی) لەگەڵ فەرماندە سەربازی و مەیدانییەكانی هێزی پێشمەرگە لە میحوەری گوێڕ كۆبۆوە. لەم كۆبوونەوەیەدا بارودۆخی مەیدانی بەرەكانی شەڕ تاوتوێ كرا و (سەرۆك بارزانی) دەستخۆشی لە پێشمەرگە قارەمانەكانی ئەم میحوەرە كرد كە، لە چەند ڕۆژی ڕابردوودا پەلاماری تیرۆریستانیان تێكشكاندووە و گورزی كوشندەیان لێ وەشاندوون و سوپاسی گیانفیدایی و خۆڕاگریی پێشمەرگەی كرد و ئەركی پێشمەرگەی بە ئەركێكی پیرۆز زانی كە بەرگریكردنە لە كەرامەتی خەڵك و خاكی كوردستان.
هەر لەم كۆبوونەوەیەدا (سەرۆك بارزانی) پاڵپشتیی تەواوی خۆی بۆ هێزی پێشمەرگە دووپاتكردەوە و لەبارەی پلان و بەرنامەكانی هێزی پێشمەرگە لەم میحوەرەدا ڕێنمایی پێویستی بۆ فەرماندەكان خستەڕوو.