دەقی ووتاری سەرۆك وەزیران نێچیرڤان بارزانی له ڕێوڕه‌سمى دانانى به‌ردى بناغه‌ى تونێلى گه‌لیى زاخۆ

Decrease font Enlarge font قەبارەی فۆنت
total views:    848
image

خوشك و برایێن خۆشتڤی، بخێر هاتن سه‌رچاڤان

دبێژن: به‌ری دو هه‌زار و چارسه‌د سالان، زینۆفۆنی دگه‌ل ده‌هـ هه‌زار له‌شكه‌رێ‌ یۆنانی، د ئه‌ڤی گه‌لی ڕا، پاشڤه‌كشانا خۆ كریه‌. هنگى زینۆفۆنی ئه‌ڤ گه‌لیه‌ بۆ خۆڕزگاركرنێ‌ بكار ئینایه‌، ئه‌ڤڕۆ ئه‌م دێ‌ بۆ كورتكرنا ڕێكێ‌ و كێمكرنا ڕویدانان و ئاسانكرنا ڕێكا بازرگانی، تونێله‌كێ‌ لێ‌ ڤه‌كه‌ین. هنگى بۆ شه‌ڕی بكار هات، ئه‌ڤڕۆ بۆ ئاشتیێ‌ و پێكڤه‌ژیانێ‌ دێ بكار هێت.

به‌ری هه‌ر تشته‌كی ئه‌ز ڤی پرۆژه‌یێ گرنگ كو ئه‌ڤرۆ ئه‌م ل ده‌ڤه‌ركا زۆر یا شۆرشگێر و یا خه‌باته‌كار، لاندكا دو شۆڕشێن مه‌زن یێن كوردستانێ ده‌ڤه‌را زاخۆ یا ده‌لال ئه‌م ڤی پرۆژه‌ی ل وان پیرۆز دكه‌ین.

هه‌ر ب ڤێ هه‌لكه‌فتێ، ئه‌م سه‌رێ خۆ و به‌ژنا خۆ بۆ وان خه‌باتكار و شه‌هیدان دچه‌مینین ئه‌وێن خه‌بات كرین و خوینا خۆ داین و فیداكاری بۆ هندێ كرین ئه‌م ڤێ ڕۆژێ ببینین، بۆ هه‌موو شه‌هیدێن د ڕێیا ڕزگارییا ملله‌تێ مه‌دا خه‌بات كری، ئه‌ڤڕۆ فه‌ره‌ بیرا خۆ لێ بینینه‌ڤه‌، هه‌م بیرا مه‌ بێت كو ئه‌ڤ تشتێ نها هه‌یی ده‌وله‌تسه‌رێ خه‌بات و ماندیبوون و خۆڕاگرییا وان قه‌هره‌مانا، وان شه‌هیدا، وان پێشمه‌رگایه‌ ئه‌وێن خه‌بات كری تا كو ئه‌م ڤێ ڕۆژێ ببینین. هه‌وه‌ پیرۆز بیت خه‌لكێ ده‌ڤه‌را زاخۆ یا خۆشتی و هه‌موو خه‌لكێ كوردستانێ.

خوشك و برایێن هێژا..

ئه‌ڤڕۆ دێ‌ به‌رێ‌ بنیاتی بۆ تونێلا گه‌لیێ‌ زاخۆ دانین. هندی ئه‌ز ئاگه‌هدار، ئه‌ڤه‌ ئێكه‌مین تونێله‌ ل پارێزگه‌ها دهۆكێ‌، لێ‌ ئه‌م پشتڕاستین یا دوماهیێ‌ نینه‌. ب به‌رهه‌مێ‌ خۆ و خوینا خه‌لكێ‌ كوردستانێ‌، دێ‌ ب ده‌هان ڕێك و تونێلێن باشتر ئه‌گه‌ر خودێ حه‌ز بكه‌ت لێ ڤه‌كه‌ین و كوردستانێ ئاڤه‌دان كه‌ین.

ڕێكا نێڤده‌وله‌تی كو هه‌رێما كوردستانێ‌ و ئیراقێ‌، ب تركیا و باكوور و ڕۆژاڤاڤه‌ گرێ‌ دده‌ت، ڕێكه‌كا گه‌له‌ك ستراتیجی و ژینداره‌ بۆ هه‌ر ئالیه‌كی. ئه‌ز دشێم ناڤێ‌ ڕێكا (ئاشتی و پێكڤه‌ژیانێ‌) لێ‌ بكه‌م، چونكی دێ‌ ڕێكا كوردستانێ‌ و ئیراقێ‌ ب تركیاڤه‌ گرێ‌ دده‌ت و ئاسانتر لێ‌ كه‌ت و دێ‌ ده‌رگه‌هی ل به‌ر بازرگانیا ناڤنه‌ته‌وه‌یی به‌رفره‌هتر كه‌ت به‌ره‌ف كوردستانێ و ئیراقێ.

ئه‌ڤ پڕۆژه‌ ب گوژمێ‌ 158 ملیار دیناران، دو تیۆبێن دوسایدی ب درێژییا 3.6 كیلۆمه‌تران، پارچه‌یه‌كه‌ ژ پرۆژه‌یه‌كێ‌ مه‌زنتره‌، ئه‌و ژی به‌رفره‌هكرنا هه‌می ڕێكێن ناخۆیێن كوردستانێیه‌ و یێن كوردستانێ‌ ب ده‌رڤه‌ گرێ‌ دده‌ن. خۆشكرن و ئاسانكرنا ڕێكا گه‌لیێ‌ زاخۆ، دێ‌ چه‌ندین خزمه‌تان كه‌ت، ژ وان:
ـ ئاسانكرنا ڕێكا بازرگانی ل ناڤبه‌را كوردستانێ‌ و ئیراقێ‌ دگه‌ل تركیا و ڕۆژاڤا.
ـ كێمكرنا ڕویدانان كو ڕۆژانه‌ ل ئه‌ڤێ‌ ڕێكێ‌ ڕوی دده‌ن.
ـ كورتكرنا ڕێكێ‌.
ڕێزداران..
ڕێ‌، ئانكو هه‌ڤبه‌ندی و هه‌ڤناسین و تێكه‌لی. سیاسه‌تا حكوومه‌تا هه‌رێما كوردستانێ‌ د ڤی واریدا ئه‌وه‌ كو ڕێكێن ناڤخۆ و یێن ده‌رڤه‌، بگه‌هینینه‌ ستانده‌ردێن جیهانی. ل هه‌می پارێزگه‌هێن هه‌رێمێ‌ مه‌ ده‌ست ب هه‌وه‌كا جۆتسایدكرنا ڕێكێن گرنگ و پرۆژه‌یێ‌ هایوه‌ی كرییه‌.

ئه‌م ل حكوومه‌تا هه‌رێما كوردستانێ، دێ‌ ب ئاڤه‌دانكرنێ‌ و ئارامیێ‌ و پێكڤه‌ژیانێ‌ و ئاشتیێ‌ خه‌باتێ‌ كه‌ین، هیڤیدارین ئه‌ڤه‌ ببته‌ زمانێ‌ هه‌می هێز و ئالیێن دی، چ ل ئاستێ‌ ناڤخۆ چ ل ئاستێ‌ ده‌رڤه‌.

هێژایان..
ئازادی و ئارامی و ئاڤه‌دانی و پێشكه‌ڤتنا هه‌رێما كوردستانێ‌، به‌رهه‌مێ‌ خه‌باته‌كا دویر و درێژا خه‌لكێ‌ كوردستانێیه‌، ب ساناهی نه‌هاتینه‌ و پێدڤییه‌ ب ساناهی ژی نه‌چیت. ئه‌وێن دوهی خوینا خۆ كرینه‌ قوربانی ڕێكا ڕزگاریێ‌، ئه‌ڤڕۆ ڕه‌نج و خوها خوه‌ دكه‌نه‌ قوربانی ئاڤه‌دانی و ئارامی و پێشكه‌ڤتنێ‌.

حكوومه‌تا هه‌رێما كوردستانێ‌ به‌رهه‌مێ‌ ڕه‌نج و خه‌باته‌كا زۆره‌، ئه‌گه‌ر ئه‌م ئه‌ڤڕۆ ڤێ ئه‌زموونێ‌ نه‌پارێزین و كوردستانێ‌ نه‌گه‌هینینه‌ به‌نده‌رێ‌ ئازادیێ‌ و به‌خته‌وه‌ریێ‌. ئه‌ز باوه‌ر دكه‌م دێ كێماتی بیت بۆ مه‌.

ئه‌ڤڕۆ ئه‌م هه‌می داخوازكرینه‌ پشكداریێ‌ د ئێكرێزییا ناڤمالا كوردستانیدا بكه‌ین، ئه‌م داخوازكرینه‌ ئێك بگرین و ل ئاستێ‌ ڕویدانێن ده‌ڤه‌رێ‌ بین. ئه‌م داخوازكرینه‌ پارچه‌یه‌ك بین ژ ئاڤه‌دانكرنێ‌، نه‌ وێرانكرنێ و ڕه‌شبینیێ‌.

ئه‌ڤڕۆ ساته‌كا دیرۆكییه‌، ئه‌م پێدڤی بڕیاره‌كا دیرۆكینه‌.
ئه‌م دێ‌ تونێل و ڕێكێن ئاشتیێ‌ و براتیێ‌ و پێكڤه‌ژیانێ‌ و ئاڤه‌دانیێ‌ ڤه‌كه‌ین، دێ‌ ل هیڤیا ڕێڤینگێن ئاڤه‌دانیێ‌ بین كو ئه‌ڤان ڕێكان بكار بینن. بۆ خزمه‌تكه‌كا زێده‌تر یا ملله‌تێ مه‌.

ل دوماهیێ‌، هیڤیا سه‌رفه‌رازیێ‌ بۆ كۆمپانیا لیماك یا توركی دخوازم، كو ئه‌ڤڕۆ وان ئه‌ڤ پڕۆژه‌ ده‌ستپێكری، هیڤیدارم ب ئاسته‌كێ‌ باش ئه‌ڤی پڕۆژه‌ی ئه‌نجام بده‌ت، چونكی دێ‌ بیته‌ ده‌رگه‌هه‌كێ‌ به‌رفره‌هتر بۆ مه‌ دگه‌ل دنیایێ‌ و بۆ كۆمپانیایێ‌ دێ‌ بیته‌ ده‌رگه‌هێ‌ پتر یێ ناڤداریێ‌ ل هه‌موو جیهانێ.

ئه‌ز سوپاسییه‌كا تایبه‌تا خۆ ئاراسته‌ی وه‌زیرێ ئاڤه‌دانكرنێ و ده‌زگه‌هێن په‌یوه‌ندیدار و پارێزگه‌ها دهۆكێ دكه‌م، سوپاسیا وان دكه‌م بۆ ماندیبوونا وان ب ڤی پڕۆژه‌ی ڤه‌، هیڤیدارم ئه‌ڤ پرۆژه‌ د وه‌ختێ خۆدا ته‌مام بیت و ببیته‌ ئه‌گه‌رێ كارئاسانییه‌كا زێده‌تر بۆ هه‌موو ئالییان.

هین هه‌مى لا بخێر بێن و سه‌رچاڤا، پیرۆز بیت و هه‌ر شاد و سه‌ركه‌فتی بن.