فازل میرانى: ناكرێ لایه‌نى دیكه‌ ناڕه‌زایى به‌رامبه‌ر خۆپاڵاوتنه‌وه‌ى بارزانى ده‌رببڕێت

Decrease font Enlarge font قەبارەی فۆنت
total views:    871
image

سكرتێری مەكتەبی سیاسیی پارتیی دیموكراتی كوردستان پشتیوانیی لە كاندیدكردنەوەی سەرۆكی هەرێمی كوردستان، مەسعوود بارزانی دەكات بۆ پۆستێكی دیكە و جەخت دەكاتەوە، "ناشێت لایەنی بەرانبەر لە كاندیدكردنەوەی بارزانی ڕێگر بێت كاتێك بابەتەكە لە چوارچێوەیەكی یاساییدایە." ڕایشیگەیاند كە مشتومڕ لەم ڕووەوە ئاساییە، چونكە سەرۆكایەتیی هەرێم جێبایەخی هەمووانە و لە دید و بۆچوونی ئەوانی دیكەیش نیگەران نابین.

لە چاوپێكەوتنێكیدا كە ڕۆژنامەی شەرقولئەوسەتی لەندەنی لە ژمارەی ئەمڕۆ چوارشەممەیدا لەگەڵیدا سازی داوە، فازل میرانی دەڵێت: "سەردانی مەلا بەختیار و حیزبەكانی ئۆپۆزسیۆنیشمان كرد تا هەڵوێستیان دەربارەی هەڵبژاردن بزانین، بەڵام بە داخەوە لەو كاتەیدا كە ئێمە چاوەڕێی ئەوەمان دەكرد سەردانمان بكەنەوە و هەڵوێستی خۆیانمان بە نووسراو پێڕابگەیەنن، بەڵام بەدەر لە نەریت، بەیاننامە ڕۆژنامەوانییەكانیان، بەیاننامەكانی ئەنجوومەنی سەركردایەتیی شۆڕش(مجلس قیادە السورە) و كودەتا سەربازییەكانیان بیر خستینەوە."

میرانی زیاتر ڕوونی كردەوە، "سەیرە ئەو حیزبانەی ئەمڕۆ  دەیانەوێت هەڵبژاردنی سەرۆكی هەرێم بۆ پەرلەمان بگوێزنەوە، هەر ئەوان بوون هەڵبژاردنی 2005ـیان خستە بەر ڕەخنەوە كە لەلایەن پەرلەمانەوە بوو؛ هەر ئەمەیش بوو هانی سەرۆكی هەرێمی كوردستان، مەسعوود بارزانی دا تا هەڵبژاردنی سەرۆكی هەرێم لە لایەن پەرلەمانەوە بگۆڕێت بۆ هەڵبژاردنی ڕاستەوخۆ و لەلایەن جەماوەرەوە."

فازل میرانی باوەڕەی وایە كە هەڵبژاردنی سەرۆك لە لایەن گەلەوە بێت باشترینە، چونكە بوار بۆ هەمووان هەیە لە ڕێگەی دەنگدانی ڕاستەوخۆوە ڕای خۆیان بخەنە ڕوو، هەروەك ئەوەی لە 2009ـدا بەرجەستە بوو، چونكە هەڵبژاردنی سەرۆك لە پەرلەمان لەو مافە بێبەشیان دەكات."

زیاتر گوتی "كێ دەزانێت؟ رەنگە بارزانی بە خۆكاندیدنەكردنەوەی هەمووان سەرسام بكات، هەروەك ئەوەی ڕایگەیاندووە كە نەیویستووە داوای پۆست و پلە و پایە بكات. بۆ مێژوویش دەبێت ددان بەوەدا بنێین كە ئەو پیاوە بەرگری لە مافە نەتەوایەتییەكان كردووە و پێگەی هەرێمی لە نێوخۆ و دەرەوەیشدا جێگیر و بەهێز كردووە و پارێزگاری لە یەكیەتیی خاكی هەرێمی كوردستان كردووە، دەنگی پێ بدەین یان نا، دەبێت ڕێز لەو ڕۆڵەی بگرێن."

لەبارەی گێڕانەوەی پڕۆژەی دەستووریشەوە بۆ پەرلەمان، میرانی دەڵێت، لە كاتێكدا كە 99%ـی دەنگی پێ دراوە ئەمە پاش گفتوگۆ و ڕێكخستنەوەی، مافی سەرۆكی هەرێمە ئەو دەستوورە بخاتە دەنگدانەوە تا گەل بڕیاری خۆی لەبارەوە بدات، سەرباری ئەمانە دەستوور قابیلی گفتوگۆیە و دواقسە و بڕیاریشی بۆ سەرۆكی هەرێم گەڕاندەوە.

دەربارەی پێكهێنانی حكوومەتێكی یەكگرتوویش كە ئەوكات بە سەوداو مامەڵەیەكی دەرەوەی پەرلەمان ناوی برا، سكرتێری مەكتەبی سیاسیی پارتی گوتی: "بۆ ئۆپۆزسیۆن پێشنیازمان كرد تا ئەنجامدانی هەڵبژاردن بێن و پێكەوە حكوومەتێكی یەكیەتیی نیشتمانی پێك بهێنین بۆ ئەوەی خۆیان ئەو چاكسازییەی دەیانەویست ئەنجامی بدەن، بەڵام ڕەتیان كردەوە. ئەو سەوداو مامەڵەیەیش كە باسی لێوە دەكەن دەشێت پاش ئەنجامدانی هەڵبژاردن و تێگەییشتنی هەرلایەك لە قەبارەی خۆی بە ئامانج بگات."

ئەو زیاتر گوتی: "ئێمە پێمان وایە ئۆپۆزسیۆن دەیەوێت دەستەڵات بگرێتە دەست، بەڵام ئەمە لە ڕێگەی هەڵبژاردنەوە نەبێت بەدەست نایەت، با بەختی خۆیان تاقی بكەنەوە و ئێمەیش چاوەڕوانین، لەگەڵ ئەوەیشدا ئێمە لەگەڵ ئەوەین پاش هەڵبژاردن حكوومەتێكی یەكیەتیی نیشتمانی پێك بهێنین تا بەرگەی هەموو بەرپرسارەتییەك بگرێت."

لە وەڵامی ئەوەیشدا كە ئۆپۆزسیۆن تۆمەتی جێگیركردنی فەرمانڕانیی خانەوادەی بارزانی بۆ سەرۆكایەتیی هەرێم بە حیزبەكەی دەبەخشێتەوە، میرانی كە سكرتێری پارتییە دەڵێت: "جارێ ئێمە لە پابەندبوونمان بە سەركردایەتیكردنی ئەو خانەوادەیە بۆ حیزب شەرم ناكەین، ئەوان پێشتر سەركردەی بزووتنەوەی ڕزگاریخوازی بوون، تا ئەمڕۆیش هەمووان و حیزبیش هەن ئیمنتمایان بۆ ئەو حیزبە هەیە و سەركردایەتیی ئەو خانەوادە تێكۆشەرەیان قبووڵە، حیزبی خانەوادەییش لە زۆر شوێنی دیكەی جیهاندا هەن، نموونەی ئەفغانستان و پاكستان..هتد، كاك نوشیروانیش لەبارەی هەندێكیانەوە وتاری نووسیوە؛ بابەتی سەركردایەتیی حیزب كێشەی ئێمەیە و پێوەندیی بە ئەوانی دیكەوە نییە، ئەوەیش كە پێوەندی بە كاندیدەكانمانەوە هەیە بۆ هەر پۆستێك بۆچی ئەوانی دی ڕێگری دەكەن؟ ئەگەر نێچیرڤان بارزانیمان بۆ سەرۆكایەتیی حكوومەت كاندید كرد بۆچی ڕێگری دەكەن؟ ئەوانیش مافی خۆیانە وەزیرەكانیان كاندید بكەن، ئێمەیش مافی خۆمانە سەرۆكیك بۆ حكوومەت و سەرۆكایەتیی هەرێم دیاری بكەین، ئێمە ڕێزمان لە بڕیاری ئەوان گرتووە و پێویستە ئەوانیش ڕێز لە بژاردە و بڕیارەكانی حیزبەكەمان بگرن كاتێك سنووری یاسایی نابەزێنن."

جیاوازیی هەڵوێستەكانی یەكێتیی نیشتمانیی كوردستانیش لەبارەی كاندیدكردن و دەستوورەوە، میرانی میرانی وەهای دەخاتە بەر باس: "لە ڕاستیدا پاش نەخۆشكەوتنی فەخامەتی سەرۆك تاڵەبانی كە داوای زوو چاكبوونەوەی بۆ دەخوازین، بە بواوەڕی تەواوەوە دەڵێم، ئەگەر لە عێراق و لە نێو یەكێتیی نیشتمانی و هەتا لە نێو ئێمەیش پارتیدا، بەهای مام جەلالمان نەزانی تاوەكو بە شێوەیەكی كاتی لێمان دوور كەوتەوە. دوای ئەو نەخۆشییەی بەرەوڕووی لێدوانی دژبەیەكی سەركردایەتیی حیزبەكەی دەبینەوە، لەبەر ئەوە ئێمە دوودڵ نین. ڕێز لە دۆخی ئەوان دەگرین و لە چارەنووسی هاوپەیمانەكەیشمان ناترسین، چونكە هەڤاڵانمان هەن لە نێو یەكێتیدا كە پێكەوە تێكۆشاوین، باوەڕیشم وایە كە یەكێتی لەسەر ئەم تێكۆشان و ڕێڕەوی هاوپەیمانەتیی ستراتیژییەی بەردەوام دەبێت."

میرانی دەربارەی ڕێككەوتنی نێوان نێچیرڤان بارزانی و نووری مالیكی كە لە چەند ڕۆژی ڕابردوودا لە بەغدا ساز درا گوتی: "گفتوگۆ شێوازی سەردەمە و شەڕیش هەر بە دیالۆگ كۆتایی دێت. مالیكی تا 1014 سەرۆكوەزیرانە و هەوڵمان دا متمانەی لێ وەربگرینەوە و بە هۆی نەبوونی كۆدەنگیی تەواو لەبارەیەوە تێیدا سەرنەكەوتین، كەواتە پێوەندیی لەگەڵدا بپچڕین؟ هەتا كەی؟ یان لە عێراق جیا ببینەوە، كە ئەمە لە بەرژەوەندیمان نییە؟ كەواتە دەبێت لەگەڵیدا گفتوگۆ بكەین و هەر ئەوەیشمان كرد و لەگەڵیشدا ڕێككەوتین، بەڵام نابێت ڕێككەوتنمان لەسەر حیسابی ئەوانی دیكە بێت."

میرانی داوایشی كرد كە بەو پێیەی كە سەرۆكوەزیرانی هەموو عێراقییەكانە نەك شیعە بە تەنیا، سینگی فراوان بێت و بە ڕووی سوننە كە پێكهاتەیەكی گرنگە.