جەعفەر ئیبراهیم: پارتی بە چاوێكی تەكتیكییەوە تەماشای رێكەوتنی ستراتیژی ناكات

Decrease font Enlarge font قەبارەی فۆنت
total views:    1085
image

لە بەرنامەی لە كوردستانەوە كە شەوی ڕابردوو لە كوردستان تیڤی پێشكەش كرا، لە وەڵامی پێشكەشكاری بەرنامەكە، گوتەبێژی فەرمیی پارتیی دیموكراتی كوردستانجەعفەر ئیبراهیم سەبارەت بە ڕێككەوتنی ستراتیژیی نێوان پارتی و یەكێتی، ڕایگەیاند:

پارتی هەمیشە لە ڕووی مەبدەئی و ستراتیژییەوە، بیر لەم ڕێككەوتنە دەكاتەوە. ئێمە نە لە كاتی ئیمزاكردنەكە و نە ئێستایش بە چاوێكی تاكتیكییەوە تەماشای ڕێككەوتنی ستراتیژی ناكەین، كە كەی بێهێزین ڕێككەوتنەكەمان قبووڵ بێت و كەی بەهێز بین داوای نەمانی بكەین.

ڕێككەوتنی ستراتیژی بۆ ئەوسا و ئێستا زەروورەتێكە، چونكە كورد سوودی لێ بینیوە، كەواتە پارتی و یەكێتی پێش خەڵكی دیكە سوودیان لێ بینیوە. ئێمە ڕەخنەكانی هەندێ لایەنی ئۆپۆزسیۆن بە جیددی وەردەگرین، بەڵام ئەو دەنگۆیانەی دەڵێن گوایە لایەنێك لەو ڕێككەوتنە مەغدوورە، ئەمە نە ڕاستەو نە جێگەی قبووڵیشە.

گوتەبێژی پارتی، سەبارەت بەوەی گوایە لە نێوان پارتی و یەكێتیدا هاوسەنگیی سیاسی و زۆرترین پۆست بە لای پارتیدا شكاوەتەوە و یەكێتی كەمتری بەركەوتووە، ڕوونی كردەوە: ئێمە لەگەڵ هاوسەنگیداین، بەڵام ئایا دەكرێ تا مدیر ناحییەكیش ئێمە پەنجا بە پەنجا بین، ئەگەر بەرپرسێك پارتی بێت دەبێ جێگرەكەی یەكێتی بێت، یان بە پێچەوانەوە؟
ئەم تێڕوانینە نە ڕاستەو نە ڕەوایشە، خەڵكیش ئەمەمان لێ قەبووڵ ناكات.

باشە گوناهی پارتی چییە كورسی زیاتری لە لایەنی تر بۆ پارلەمان وەدەست هێناوە؟ ئایا تۆ دەتوانی دەنگی خەڵك كە داویانە بە پارتی، بە لایەنێكی دیكەی ببەخشییەوە؟ ناتوانی! هاووڵاتی ئازادە دەنگ بە كێ دەدات و لەسەر ئەو لایەنەیش پێویستە ڕێزی دەنگدەری خۆی بگرێت. لێرەدا ئیستیحقاقی هەڵبژاردن دێتە پێشەوە، بۆیە دەبێ ئەمە بكرێتە بنەما بۆ پپكهێنانی حكوومەت و هەر ئیدارە و پۆستێك.

لە بەغدا پارتی 30 كورسیی هەیە، یەكێتی 13 كورسیی هەیە، گۆڕان 8ـی هەیە، واتا یەكێتی و گۆڕان پێكەوە 21 كورسییان هەیە. باشە تەوازنی سیاسیی چی؟
كە پارتی كورسیی زیاتری هەبێت، دەتوانی باسی تەوازنی سیاسیی بكەیت. هاوسەنگی چۆن دروست دەكەیت؟

ڕێككەوتنی ستراتیژی وای نەگوتووە، ئەگەر لە بەغدا لایەنێك كورسیی زیاتر بێنێ، دابەشی بكەیت بەسەر لاكەی دیكەدا. لە گەڵ ئەوەیشدا كورسیی تەعویز بەشی پارتی بووە، داومانە بە یەكێتی، لە هەڵبژاردنی كوردستاندا لانی كەم 13 كورسیی پارتی بۆ یەكێتی چوو، ئەمە منەت نییە، چونكە پێمان وایە هەرچی كەفائەتی یەكێتی هەیە، بە هیی پارتی دەزانین و هی پارتیش بۆ یەكێتی. لە ئەنجامدا بۆ خزمەتكردنی كوردستانە.

جەعفەر ئیبراهیم ئاشكرایشی كرد كە یەكێتی هیچ خاڵێكیان لە بارەی پێداچوونەوەی ڕێككەوتنەكە بە پارتی نەداوە و ئەو دەنگۆیانەیشی بە ناڕاست وەسف كرد كە گوایە یەكێتی چەند داواكاری و خاڵێكیان دابێتە پارتی. ئاماژەی بەوەیش دا كە لە هەردوو هەڵبژاردنی كوردستان و عێراقدا، یەكێتی قازانجی لەو ڕێككەوتنە كردووە، ڕێكخستنەكانیشیان باوەڕ بەو بۆچوونانە ناكەن كە گوایە یەكێتی زەرەری كردبێت.

گوتەبێژی پارتی، هەروەها ڕایگەیاند كە بۆچوونی شەخسی ئەو وایە كە پێویستە پارتی و یەكێتی لە یەك حزبدا یەك بگرن.

سەبارەت بە گێڕانەوەی دەستووریش بۆ پەرلەمان، گوتی: ئێمە پێمان وایە كوردسانیش دەستووری هەبێت وەكوو عێراق، بۆیە پێویستە ئەم دەستوورە كە 96 دەنگی پەرلەمانتارانی لەسەر دراوە، بچێتە ڕیفراندۆم و دواتر با سەد جار هەموار بكرێت و سیستەمی سیاسی لە سەرۆكایەتییەوە بكرێ بە پارلەمانی، خۆ سیستەمی سەرۆكایەتی نە بەس تەنیا بۆ پارتییە، بەڵكوو بۆ هەموو كوردستان و لایەنە سیاسییەكانە، ئێمە لەگەڵ ئەوەداین با جارێ كوردستان ببێتە خاوەنی دەستوور.