ده‌قی وتاره‌که‌ی نێچیرڤان بارزانى لە ئاهەنگی ساڵیادی شۆڕشی مەزنی ئەیلوول لە شاری دهۆک

Decrease font Enlarge font قەبارەی فۆنت
total views:    1044
image

ئێواره‌ى ئه‌مڕۆ 11ى ئه‌يلوولى 2012 له‌ مه‌راسیمێکی پڕ جۆش و خرۆشدا و له‌ به‌رده‌م ئاپۆڕای خه‌ڵکی دهۆک، نێچیرڤان بارزانی یادی شۆڕشی ئه‌یلوولی به‌رز ڕاگرت و کادیرانی پارتی دیموکراتی کوردستانی هان دا به‌ خاکه‌ڕاییه‌وه‌ خزمه‌تی میلله‌ت بکه‌ن و سرووش له‌ پاڵپشتیی خه‌ڵک وه‌ربگرن.
نێچیرڤان بارزانی، جێگری سه‌رۆکی پارتی دیموکراتی کوردستان و سه‌رۆكى حكوومه‌تى هه‌رێمى كوردستان، گوتی “بۆ پارتی سه‌ربه‌رزییه‌ که‌ شه‌ره‌فی به‌ڕێوه‌بردنی شۆڕشی ئه‌یلوولی به‌ سه‌رکردایه‌تیی مسته‌فا بارزانیی نه‌مر پێ به‌خشرا تا ناوچه‌ جیاکانی کوردستان له‌ یه‌ک نزیک بکاته‌وه‌ و یه‌کبوونی نه‌ته‌وه‌یی کورد بکاته‌ ''حه‌قیقه‌تی خه‌باتی کورد.''
سه‌رۆکی حکوومه‌تی هه‌رێمی کوردستان هه‌روه‌ها گوتی "شۆڕشی ئه‌یلوول شۆڕشی گه‌لی کوردستان بووه‌ بۆ سه‌ربه‌ستی و ئازادی". نێچیرڤان بارزانی گوتيشی "به ڕێنوێنی و سه‌رکردایه‌تیی مسته‌فا بارزانیی نه‌مر، بزووتنه‌وه‌ی کورد له‌ چوارچێوه‌ی عه‌شیره‌تی هاته‌ ده‌ره‌وه‌ و بۆ یه‌که‌م جار له‌ مێژوودا، شێوازێکی نه‌ته‌وه‌یی وه‌رگرت".
له‌ به‌شێكى ديكه‌ وته‌كه‌يدا نێچیرڤان بارزانی ئاماژه‌ى به‌وه‌ دا كه‌ ''له‌ زاخۆوه‌ تا خانه‌قین، بارزانی توانیی هه‌موومان له‌ ژێر یه‌ک ئاڵادا کۆ بکاته‌وه‌. ئازادی و سه‌رفرازی بۆ کورد په‌یامی بارزانیی نه‌مر بوو.''
نێچیرڤان بارزانی شۆڕشی ئه‌یلوولی به‌ شۆڕشێک ناساند که‌ دژی تیرۆر و تۆقاندن بوو و ڕێزی له‌ خه‌ڵکی مه‌ده‌نی ده‌گرت، ''شۆڕشێک که‌ له‌ پێناوی ئاوه‌دانی بوو، نه‌ک کاولکاری.''
ده‌رباری دۆخی ئێستای هه‌رێم، نێچیرڤان بارزانی گوتی ''کوردستان جێگه‌ی هه‌موومانی تێدا ده‌بێته‌وه، هه‌موو ڕه‌نگ و ده‌نگه‌کان.''‌
جێگری سه‌رۆکی پارتی ديموكراتى كوردستان و سه‌رۆكى حكوومه‌تى هه‌رێمى كوردستان له‌باره‌ی دۆخی ئێستای عێراق و ناوچه‌که‌شه‌وه‌‌ گوتی "کورد پێشه‌نگی شۆڕشی گه‌لانی ناوچه‌که‌ بووه‌ بۆ سه‌ربه‌ستی و ئازادی و پرۆسه‌ی سیاسی ده‌بێ له‌ عێراق بگه‌ڕێته‌وه‌ بۆ ده‌ستوور و نیازپاکی".

ئه‌مه‌ی خواره‌وه‌ ده‌قی وتاره‌که‌ی نێچیرڤان بارزانى یه‌:

هێژایان جه‌ماوه‌رێ خۆ راگرێ دهۆكا خۆشتڤی، ئاماده‌بوویێن به‌رێز، هه‌موو لایه‌ك بخێر بێن سه‌ر چاڤان و سه‌ر سه‌ران. پێ خۆشحالم جاره‌كا دی دگه‌ل هه‌وه‌یێن به‌رێز به‌شداریێ بكه‌م ل بیره‌وه‌رییا 66 سالیا دامه‌زراندنا پارتى دیمۆكراتى كوردستان و شۆڕشا ئیلۆنێ.

ئه‌م ل ڤێ ده‌لیڤێ پیرۆزباهیێن خۆ ل هه‌موو گه‌لێ كوردستانێ دكه‌م و رێز و قه‌درزانین بۆ جانێ پاكێ هه‌موو شه‌هیدێن كوردستانێ دوباره‌ بكیه‌نه‌ڤه‌ و به‌ژنا خۆ ب چه‌مینین بۆ خه‌بات و خزمه‌ت و ماندیبوونا هه‌می ملله‌تێ كورد تێكرا ئه‌نجامدای بۆ گه‌هشتنا مه‌ بۆ ئه‌ڤرۆ.
هه‌ر ب ڤێ هه‌لكه‌فتێ سه‌رێ رێزێ بۆ ئێكه‌م شه‌هیدێ ئه‌یلۆلێ د دانین كو شه‌هید (حه‌مه‌ ته‌لانی)‌ یه‌ كو هاتییه‌ نیاسین ب ئێكه‌م شه‌هیدێ شۆڕ‌شا ئه‌یلۆنێ.
بیرهاتنه‌ڤا وان هه‌موو قه‌هره‌مان، شۆڕشگێر و پێشمه‌رگا دكه‌ین كو شه‌ڤ و رۆژ خزمه‌ت كری و ماندیبووین و شه‌هیدبووین بۆ هندێ ئه‌ڤرۆ ئازادیێ بۆ ملله‌تێ خۆ بجهبینن.
خوشك و برایێن خۆشتڤى،
ل رۆژه‌كا وه‌كو ئه‌ڤرۆ، ل سالا 1961، پشتى حوكمه‌تا عبدالكریم قاسمى داخوازیێن گه‌لێ كورد ب جى نه‌ئیناین، سه‌رۆك بارزانی و پارتی نه‌چاربوون، ده‌ست بده‌نه‌ چه‌كێ شه‌ره‌فێ و خه‌بات و به‌رگریێ بۆ ئازادییا كورد و كوردستانێ بكه‌ن. ئه‌و رۆژه‌، رۆژه‌كا مێژووییه‌، نه‌ ته‌نێ چونكى سه‌رۆك بارزانی و پێشمه‌رگه‌یێن وى ده‌ست ب خه‌باتێ كر‌، گرنگییا 11ى ئه‌یلۆلێ ڤه‌دگه‌ڕت بۆ هوشیاربوونا ملله‌تێ كورد، پشتى بێده‌نگیه‌كا درێژ ل هه‌مى پارچه‌یێن كوردستانێ.
مه‌زناهییا جه‌نابێ بارزانى و پێشمه‌رگه‌یێن وى ژ ئه‌ڤێ هوشیاركرنێ دهێت. هه‌مى خه‌لكێ كوردستانێ، هه‌مى كوردپه‌روه‌ر، ل بانگێ شۆڕشێ و ئازادیێ هوشیاربوون و به‌رهه‌مێ ئه‌وێ هوشیاریێ هێشتا ل كوردستانێ به‌رده‌وامه‌. به‌رهه‌م و ئه‌نجامێ وێ ئازادییا كوردستانێ بوویه‌، ئاڤه‌دانى و پێشكه‌ڤتنا ملله‌تێ مه‌ بوویه‌.
هێژایان،
شۆڕشا ئه‌یلۆلێ شۆڕشا هه‌مى خه‌لكێ كوردستانێ بوو. شۆڕشا هه‌مى نیشتمانپه‌روه‌رێن كوردستانێ بوو. راسته‌ ئه‌ڤ شۆره‌شه‌ ب ناڤێ پارتى دیمۆكراتى كوردستان ده‌ستپێكر، لێ هه‌مى خه‌لكێ كوردستانێ تێدا به‌شداربوون. یێ كادر و نه‌كادر، یێ پێشمه‌رگه‌ و نه‌ پێشمه‌رگه‌، یێ پارتى و نه‌ پارتى. ئه‌ڤ سه‌رهه‌لدانا گشتى، سه‌رهه‌لدانا ملله‌تێ كورد بوو، سه‌رهلدانا ملله‌ته‌كێ بنده‌ست بوویه‌ بۆ ئازادیێ و رزگاركرنا وه‌لاتێ خۆ.
د شۆڕشا ئه‌یلولێ دا بۆ ئێكه‌مین جار ئێكبوونا نه‌ته‌وه‌ییا كورد و هه‌موو گه‌لێ كوردستانێ بوو راستییه‌ك و خه‌باتا گه‌لێ كورد شۆڕ‌شا كوردستانێ ژ چارچووڤێ عه‌شیره‌تى و ناوچه‌یی و پارچه‌ پارچه‌تی ده‌ركه‌فت و بوو شۆڕشه‌كا سه‌ر‌تاسه‌رى ل كوردستانێ هه‌ر ژ زاخۆ تا خانه‌قین، بارزانیێ نه‌مر ئه‌و شه‌ره‌ف دا كو هه‌موو گه‌لێ مه‌ ل بن ئێك جڤات كۆم بكه‌ت بۆ خه‌بات و رزگارییا گه‌لێ مه‌، ڤێ ئێكگرتنێ پشتى هینگى ل شۆڕش و خه‌باتا گه‌لێ مه‌ ل پارچێن دى یێن كوردستانێ و پارتێن دى ره‌نگ دایه‌ڤه‌، واته‌ پارتى و بارزانى چرایێ ئێكگرتنا كورد و كوردستانێ و هه‌لگیرساندن و مه‌شغه‌لێ شۆڕشه‌كێ بوون كو هه‌موو ملله‌تێ كورد ب ئێك ده‌نگ دگه‌ل وان دا به‌شدارى كر و بێ شك ئه‌ڤرۆ ژى ملله‌تێ مه‌ رێ ناده‌ت چ جارا ئه‌ڤ رۆناهییه‌ ژ ناڤ بچیت و ب ئاناهییا خودێ دێ گه‌نجێن ڤى وه‌لاتى د به‌رده‌وام بن ل سه‌ر خه‌بات و تێكۆشینێ بۆ گه‌هاندنا په‌یاما پارتی و بارزانی، ئه‌و ژى بجهئینانا ئازادی و سه‌رفه‌رازییا زێده‌تره‌ بۆ نه‌ته‌وه‌ و ملله‌تێ مه‌ ل هه‌ر جهه‌كی.
سیفه‌ته‌كێ دى یێ گرنگ ل شۆڕشا ئیلۆنێ، كو ل هیچ شۆڕشه‌كا هه‌ڤچاخ ناهێته‌ دیتن، دژاتییا تیرۆرێ و توندییا دژى خه‌لكێ مه‌ده‌نى بوویه‌. شۆره‌شا ئیلۆنێ ئه‌و شه‌ره‌ف هه‌بوو ل مێژوویا كو چارده‌ سالان ڤه‌كێشا، یه‌ك (حاله‌تێ) تیرۆرێ نه‌هاته‌ ئه‌نجامدان دژی خه‌لكێ مه‌ده‌نی، ده‌لیڤه‌یا هندێ نه‌هاته‌ دان كو ئه‌ڤ سه‌رهه‌لدان و ئه‌ڤ خه‌باتا ملله‌تێ مه‌ بۆ ب ده‌ستئینانا مافێن خۆ ببیته‌ خه‌باته‌ك، ببیته‌ دوژمناتییه‌ك دژی برایێن مه‌ یێن عه‌ره‌ب ل ئیراقێ، به‌لكو ئه‌ڤه‌ شه‌رێ ئازادی و سه‌رفرازییا ملله‌ته‌كی بوو دژى دكتاتوریه‌تێ بۆ گه‌هشتن ب مافێن خۆ یێن ره‌وا د ئیراقا ئێكگرتیدا.
هینگێ و ئه‌ڤرۆ ژى، ب دیتنا مه‌، خه‌بات بۆ ئازادییا مرۆڤیه‌، بۆ رزگاركرنا كوردستانێیه‌.. نه‌ ژبۆ تیرۆرێ و كوشتنێ و وێرانكرنێیه‌، ملله‌ته‌كێ بنده‌ست ده‌عوا مافێن خۆ كریه‌ خه‌بات بۆ بده‌سئینانا وان مافان كریه‌. ئه‌ڤى ره‌نگێ خه‌باتێ رێز و حورمه‌ته‌كا مه‌زن بۆ ملله‌تێ كورد ل ناڤ هه‌مى دنیایێ په‌یداكر و رۆژ بۆ رۆژێ، دۆستێن گه‌لێ مه‌ زێده‌كرن.
ئه‌ڤرۆ جهێ شانازیێ یه‌ بێژین هیچ وه‌خته‌كی خه‌باتا ملله‌تێ مه‌ ده‌ست بۆ توندوتیژیێ و تیرۆرێ نه‌بریه‌ بۆ ب ده‌ستئینانا مافێن خۆ، جهێ شانازیێ یه‌ بۆ پارتى سه‌ركرداتییا وێ شۆره‌شا مه‌زن كر بۆ پاراستنا ملله‌تێ مه‌.
پاراستنا برایه‌تی و دوستایه‌تییا ملله‌تان كوردستان ل سه‌ر ده‌مێ شۆرشا ئیلۆنێ كره‌ مال و كره‌ په‌ناگه‌هه‌ك بۆ هه‌مى شۆڕشێگێڕێن كورد و عه‌ره‌ب ل ڤی وه‌لاتی. شۆڕشا ئیلۆنێ، شۆڕشا خه‌لكێ كوردستانێ بوویه‌ دژى زۆردارى و سته‌ما ده‌ستهه‌لاتێ ل به‌غدا. له‌و، شه‌ڕ ژ ئاستێ له‌شكه‌رى قه‌ت نه‌ دابه‌زى ناڤ خه‌لكى. ئه‌ڤه‌ سه‌رفه‌رازیه‌كا مه‌زن بوو د شۆره‌شا ئیلۆنێ دا.
رێزداران،
ل بیره‌وه‌ریه‌كا هۆسا، پێدڤیه‌ ئه‌م لسه‌ر ره‌وشا هه‌رێمێ، ئیراقێ و رۆژهه‌لاتا ناڤین راوه‌ستین. ل سه‌رده‌مه‌كی كو شۆره‌شێن جه‌ماوه‌ری و خه‌باتا مه‌ده‌نی كاریگه‌رییه‌كا مه‌زن لسه‌ر ناوچه‌یا رۆژهه‌لاتا ناڤین دروستكریه‌، گه‌لێ كوردستانێ ب راپه‌رینا ئادارا سالا 1991 بوویه‌ پێشه‌نگ بۆ راپه‌رینا جه‌ماوه‌ری ل رۆژهه‌لاتا ناڤین.
ل كوردستانێ، ئه‌م ژ هه‌ر وه‌خته‌كێ دى پتر، پێدڤى ب ئێكرێزى و ئێكگرتنا ناڤمالا كوردستانینه‌ دا بشێین دگه‌ل پێشهاتێن تازه‌ سه‌ره‌ده‌ریێ بكه‌ین و بشێین پێنگاڤێن باشتر بهاڤێژین بۆ پاشه‌رۆژه‌كا گه‌ش بۆ ملله‌تێ خۆ.
دگه‌ل ئیراقێ؛ مه‌ هیڤى هه‌یه‌، ده‌ستوور و دانوستاندن، دگه‌ل نییه‌تا پاكژ، هه‌مى ئاسته‌نگان راكه‌ن و كولتۆرێ گه‌فان و شه‌ڕان ئێدى نه‌مینت و زمانێ دانوستاندنێ د ناڤبه‌را خه‌لكێ ئیراقێ دا ببیته‌ كه‌لتۆری مه‌ هه‌میان . مه پێكڤه‌ گه‌له‌ك ئازار و نه‌خۆشى ژ دكتاتۆریه‌تێ و شه‌ڕى دیتینه‌، هیڤیدارین، دایالۆگ ته‌نێ ببته‌ زمانێ تێكگه‌هشتنێ ل ‌ڤى وه‌لاتى. خه‌لكێ ‌ڤى وه‌لاتى هه‌ژى ئازادى و ئاشتى و خزمه‌تگوزارییا زێده‌تره‌.
ل ئاستێ رۆژهه‌لاتا ناڤین و جیهانێ؛ سیاسه‌تا مه‌، هه‌رده‌م دگه‌ل ته‌بایى، ئاشتى و براتیێ بوویه‌. مه‌ هه‌رده‌م بزاڤكریه‌ بۆ برایه‌تیێ و مه‌ ده‌ستێ هه‌ڤالینیێ درێژكریه‌ بۆ وان ملله‌تێن كو كورد دناڤدا دژین.
كوردستان و بزاڤا رزگاریخوازا كوردستانێ، هه‌رده‌م مالا هه‌میان بوویه‌، خیڤه‌ته‌ك بوویه‌ جهێ هه‌میان تێدا هه‌بوویه‌، مه‌ ل كوردستانێ و ب تایبه‌تی دناڤ پارتى دیمۆكراتی كوردستان دا، هه‌مى ره‌نگ و نه‌ته‌وه‌ و بۆچۆن هه‌لگرتینه‌ و پێكڤه‌ به‌ره‌ڤ ئارمانجێن هه‌ڤپشك برینه‌.. ژبه‌ر ڤێ چه‌ندێ هه‌رده‌م مه‌ شیان هه‌بوویه‌ خوه‌ دگه‌ل سه‌رده‌مى بگونجینین، و سه‌ركێش و پێشه‌نگ بین ل خه‌باتێ بۆ ئارمانجێن نیشتمانى و نه‌ته‌وه‌یى یێن ملله‌تێ كورد.
هیڤیدارم نها ژى پارتى دیمۆكراتی كوردستان و هنگ، په‌یاما هه‌وه‌ په‌یاما ئێكرێزییا ملله‌تێ مه‌ بیت و پێكڤه‌ كاركرن بیت بۆ ب ده‌ستئینانا وان مافێن كو ئه‌ڤه‌ 66 ساله‌ خه‌بات بۆ دهێته‌ كرن و قوربانی بۆ دهێنه‌ دان خه‌لك ل پێناڤێ وێ دهێـنه‌ شه‌هیدكرن.
جاره‌كا دى ڤێ بیره‌وه‌ریێ ل هه‌وه‌ پیرۆزدكه‌م هیڤیدارم كادرێ پارتی ئه‌ركێ سه‌ر شانێ خۆ بزانن ئه‌و ژى، پێدڤییه‌ زێده‌تر د ناڤ جه‌ماوه‌ری دا بن و خزمه‌تا ملله‌تێ كورد بكه‌ن، مه‌زنترین سه‌رمایێ پارتی خه‌باتا وێیه‌ و پشتگرییا ملله‌تێ كورده‌ بۆ پارتی، پارتی د خه‌باتا خۆ دا ل سالا 1975 ێ تووشی نه‌كسه‌یه‌كا مه‌زن بوو، ژ ئه‌نجامێ موئامه‌ره‌یه‌كا مه‌زن شۆره‌شا كوردی شكه‌ست، ئه‌و تشتێ جاره‌كا دی پارتى ئێخستییه‌ سه‌ر پێین خۆ ته‌نها ئێك تشت بوو، پشته‌ڤانییا جه‌ماوه‌رێ پارتی و پشته‌ڤانییا جه‌ماوه‌رێ كورد بوو بۆ پارتی كو پارتى شیا بكه‌ڤیته‌ سه‌ر پێت خۆ.
ئه‌ڤرۆ ژى جاره‌كا دی، پێدڤییه‌ كادرێ پارتى د ناڤ حوكمه‌تێ و حزبێ دا ل هه‌ر جهه‌كی بیت، پێدڤییه‌ خۆ ب خزمه‌تكارێ ڤی ملله‌تی بزانیت، پێدڤییه‌ بزانیت سه‌رمایێ به‌رده‌وامبوونا پارتی ڤان هه‌موو سالان پشته‌ڤانییا جه‌ماوه‌ری بوویه‌، و ته‌نها و ته‌نها پارتی دێ شێت ب پشته‌ڤانییا ڤی جه‌ماوه‌ری ژیانا خۆ یا سیاسی ل كوردستانێ به‌رده‌وام بكه‌ت.
د كوردستانێ دا ئه‌ڤرۆ بۆ یه‌كلاكرنا هه‌ر كێشه‌یه‌كێ ل وه‌لاتی، مه‌ به‌حسی سندۆقێن ده‌نگدانێ كریه‌، مه‌ به‌حسێ هندێ كریه‌ كو پێدڤییه‌ ئارێشه‌یێن مه‌ ب رێكا سندۆقێن ده‌نگدانێ بهێنه‌ ئێكلاكرن.
سه‌رۆكێ پارتی ئه‌ڤ بیرۆكه‌ ل سالا 1992 پێشنیازكر كو پێدڤییه‌ كێشه‌یێن كوردستانێ ب هه‌لبژارتن بهێنه‌ ئێكلاكرن، ئه‌ڤ سیسته‌مه‌ سیسته‌مێ كوردستانێ یه‌، ئه‌و شه‌ره‌ف پارتى هه‌بوویه‌ كو ئه‌ڤ بیرۆكه‌ ل ده‌ستپێكێ پێشنیازا وێ ژ سه‌رۆك بارزانی بوویه‌.
پێدڤییه‌ پارتى باش بزانیت بۆ سه‌ركه‌فتنا خۆ ته‌نها رێكا كو پێ بسه‌ردكه‌ڤیت و به‌رده‌وامبیت ل خه‌باتێ، پشته‌ڤانییا جه‌ماوه‌رێ كوردستانێ یه‌، خزمه‌تكرنه،‌ خزمه‌تكرنا ملله‌تێ مه‌یه‌ و مالێن شه‌هیدانه‌ و ته‌وازعه‌ و چوونا ناڤ خه‌لكییه‌ وئه‌ڤه‌یه‌ دێ پارتى سه‌رئێخیت و نه‌ هیچ تشته‌كێ دی.
ده‌لیڤه‌یێن مه‌زن ل پێش مه‌ هه‌نه‌، ل پێش ملله‌تێ كورد هه‌نه،‌ ئێكرێزییا خۆ بپارێزین و خه‌باتا خۆ به‌رده‌وام بكه‌ین بێ گومان دێ گه‌هینه‌ وان ئارمانجێن شه‌هیدێن مه‌ خه‌بات بۆ كری و پێشمه‌رگێن مه‌ بۆ ماندیبووین و خه‌بات كری و شه‌هید بووین دا ئه‌ڤ رۆژا گه‌ش بۆ مه‌ بجهـ بینن.
جاره‌كا دی ب ڤێ هه‌لكه‌فتێ ئه‌ز سلاڤ و رێزێن سه‌رۆكێ پارتى بۆ هه‌وه‌‌ دئینم، بێ گومان جه‌نابێ وی گه‌له‌ك حه‌زدكر به‌شداری ڤێ ئاهه‌نگێ بیت، لێ ئه‌و ل هه‌ڤلێرێ یان ل جهه‌كێ دی دێ به‌شداربیت، له‌و سلاڤ و رێزێن جه‌نابێ وی قه‌بوول بكه‌ن و ئه‌ڤ یاده‌ ل هه‌می كورده‌كی و كوردستانییه‌كی پیرۆز بیت.
ئه‌ڤ شۆره‌شه‌ ده‌ستپێكرنا وێ پارتى بوو، لێ شۆره‌شا هه‌موو ملله‌تێ كوردستانێ یه‌، هه‌ر كه‌سه‌ك هه‌ر حزبه‌ك پشتى هینگێ ئه‌گه‌ر ژ پارتى ژى جودا ببیت، ئه‌‌ڤرۆ ئه‌و رۆژه‌یه‌ كو بیرا مه‌ بێت رێزێ ل وێ خه‌باتێ بگرین و رێزێ ل وان هه‌موو كه‌سان بگرین ئه‌وێن غه‌یری پارتى ژى كو به‌شدار بین د شۆره‌شا ئه‌یلۆلێ دا، ئارێشه‌ نینه‌ كو بۆچونێن وان ژ یێن پارتى جودا بن، لێ وان ل وێ رۆژێ خزمه‌ت ل بن ئالایێ پارتى، خزمه‌ت بۆ ملله‌تێ كورد كریه‌. پشتى هینگێ ژى خزمه‌تا خۆ به‌رده‌وام كر د پارته‌كا دی یا سیاسی دا ب بیر و بۆچووێن دی لێ دیسان بۆ خزمه‌تا ملله‌تێ مه‌، بیرا وان هه‌مییان دكه‌ینه‌ڤه‌ ئه‌ڤرۆ.
هیڤییا سه‌ركه‌فتنێ ژى بۆ هه‌وه‌ هه‌مییان دخوازم و هوون گه‌له‌ك بخێر بێن و سه‌رچاڤان.