ئاشتی هەورامی وەزیری سامانە سروشتییەكانی حكوومەتـی هەرێمی كوردستان: چەند ڕوونكردنەوەیـەكی پێویست بۆ خەڵكی كوردستان

Decrease font Enlarge font قەبارەی فۆنت
total views:    1063
image

چەند رۆژێكە لەلایەن راگەیاندنی حیزبیی بزووتنەوەی گۆڕانەوە، هەڵمەتێكی چەواشەكارانەی دەستی پێكردووە بە مەبەستێكی سیاسی، دژی سیاسەتی نیشتمانیی نەوتیی هەرێمی كوردستان و خودی من و سەرۆكی حكوومەتی هەرێمی كوردستان.

لەژێر ناوی ڕەخنەگرتن و بەراوردكردن لەنێوان چەند لێدوانێكی ئێمەدا، كە ئامانجەكەیشی تەنیا چەواشەكاریكردن و نەهێشتنی متمانەیە بە سیاسەتی نەوتیی هەرێمی كوردستان، كە بووەتە مایەی دروستكردنی گرەنتی نێودەوڵەتی بۆ ئاییندەی كوردستان و دیاركەوتنی هەرێمی كوردستان وەك ناوێكی دیار لەسەر نەخشەی وزەی جیهان، هەروەها بووەتە هۆی دابینكردنی سووتەمەنی، كارەبا و ئاو بۆ هەرێمی كوردستان و شاری خۆشەویستی كەركووك، بەشێوەیەك كە گوشار و ئابلۆقەی بەغدا لەسەر هەرێمی كوردستان لەڕووی سووتەمەنییەوە كاری تێنەكردووە. بەڵام بەداخەوە راگەیاندنی حیزبیی گۆڕان لەجیاتی پشتیوانیكردن و دەستخۆشیكردن لە دابینكردنی ئەو خزمەتگوزاریانە لەژێر ئەو گوشارانەدا بۆ خەڵكی كوردستان، هەروەها لەجیاتی رەخنەگرتن لەو ئابلۆقەیەی حكومەتی عێراق لەسەر هەرێمی كوردستانی داناوە، تەنیا پەلاماری حكومەتی هەرێمی كوردستان و وەزارەتی سامانە سروشتییەكانی بۆ خۆی كردووەتە ئامانج.

بۆ ئاگاداربوونی خەڵكی كوردستان و وەڵامدانەوەی ئەو چەواشەكارییانە، بە پێویستی دەزانین چەند خاڵێك روون بكەینەوە:

پارەی بەخشین لە گرێبەستە نەوتییەكان دا
رۆژی 8/8/2012 بەڕێز نێچیرڤان بارزانی، سەرۆكی حكومەتی هەرێمی كوردستان لە كۆنگرەیەكی رۆژنامەگەریدا لە وەڵامی پرسیارێكدا رایگەیاند كە پارەی دابینكراو لە گرێبەستە نەوتییەكان “ یەك فلس بزر نییە، یەك سەنت و یەك دۆلار بزر نییە، هەمووی دیارە و جارێ ئەوە بزانن 4 ملیار دۆلار نییە، بەڵكو كاتی خۆی كە د.ئاشتی هەورامی چووە پەرلەمان گوتی ئەگەر هەموو گرێبەستانە بكەین داهاتەكەیان نزیكەی 4 ملیار دۆلار دەبێت، نەوەكو ئێستا ئەوەندە داهاتیانە”.

ئەوەش تەواو راستە و، قسەی هەردووكمان وەك یەكە و هیچ جیاوازییەكی تێدا نییە، لە بەڵگەنامە بڵاوكراوەكانی وەزارەتی سامانە سروشتییەكانیشدا بەهەمان شێوەیە. وردەكاری ئەوەش لە كتێبی THE OIL GAS YEAR ( ساڵیانەی نەوت و گاز لە هەرێمی كوردستان –عێراق 2009) باس كراوە، كە ئەو كتێبە بە زمانی ئینگلیزی چاپكراوەو پوختەیەكیشی بە كوردی و عەرەبی بڵاوكراوەتەوە، هەر ئەوكاتیش نوسخەم بۆ بەڕێزان ئەندامانی پەرلەمانی كوردستان برد و بەسەریاندا دابەشكرا.

واتە ئەوە بەشێوەیەكی نووسراو وەك دۆیكۆمێنت لەبەردەستن و هەموو كەسێك دەتوانێ تەماشایان بكات، بۆ ئەوەی راستی قسەكانی ئێمە و چەواشەكاری راگەیاندنی گۆڕانی بۆ ئاشكرا ببێت.

لەو كتێبەدا كە گرێبەستە نەوتییەكانی ئەوكاتیشیان تێدا بڵاوكراوەتەوە، بە خشتە روونكراوەتەوە كە پارەو داهاتی دابینكراو لەلایەن ئەو كۆمپانیا نەوتییانەی كە گرێبەستیان لەگەڵ حكومەتی هەرێمی كوردستان كردووە چۆنە و چەندە و كەی و لە چ كاتێكدا دابیندەكرێ. بەپێی ئەو خشتەیەی ئەوكات بڵاومانكردووەتەوە (بەخشینی دابینكراو لەلایەن واژووكارانی گرێبەست – المنح المدفوعە لموقعی العقد) بڕەكەی 132.5 ملیۆن دۆلارە، كە ئەو پارەیە دراوەتە حكومەتی هەرێمی كوردستان بۆ پڕۆژەكردن، هەروەها لە (بەخشینی دابینكراو لە گوژمەی ژێرخان- الدعم المدفوع من البنیە التحتیە) بەو گرێبەستانەی ئەوكات بڕی 610.5 ملیۆن دۆلار دراوەتە حكومەتی هەرێمی كوردستان بۆ ئەنجامدانی پڕۆژەی ژێرخانی ئابووری، كە حكومەت بۆ بنەماڵەی شەهید و ئەنفالكراوان، پڕۆژەكانی ئاو خەرجیكردوون.

كە كۆی ئەو پارەیەی وەرگیراوە 743 ملیۆن دۆلارە لەلایەن حكومەتی هەرێمی كوردستانەوە، واتە یەك ملیاریش نییە. بڕی سێیەم كە بڕە زۆرەكەیە بریتییە لە ( گوژمەی ژێرخانی مەرجدار كە پێویستە دابینبكرێت –البنیة التحتیة المشروطة و التی یجب ان تدفع ) كە كۆی گشتی بڕەكەی 4 ملیار و 220 ملیۆن دۆلارە، كە ئەوە راستەوخۆ لەلایەن كۆمپانیاكانەوە دەكرێتە پڕۆژە بۆ ژێرخانی ئابووری بۆ هەرێمی كوردستان، بەڵام بە مەرجی سەركەوتنی پرۆسەی گەڕان و دۆزینەوەی لە زەوییە دیاریكراوەكان بۆ كۆمپانیاكە، هەروەها ناردنە دەرەوەی نەوت.

كە مەرجی هەریەك لەو كۆمپانیانە لە كتێبەكەدا روونكراوەتەوە، هەروەك لە گرێبەستەكانیاندا هاتووە. كەواتە هەموو پارەی دیاریكراو لەو 35 گرێبەستەدا 4 ملیار و 963.5 ملیۆن دۆلارە، بەڵام تەنیا 743 ملیۆن دۆلار دەدرێتە حكومەتی كوردستان بەشێوەی راستەوخۆ، بەپێی گرێبەستەكان.

لەبەرئەوەی عێراق رێگری جۆراو جۆر دروستدەكات، كۆمپانیاكان نەیانتوانیوە نەوت بنێرنە دەرەوە، لەبەرئەوەش جگە لە چەند پڕۆژەیەك، ئەوانیش پڕۆژە ژێرخانییەكانیان نەكردووە، ئەوەش مافێكی یاسایی خۆیانە. بۆ نموونە كۆمپانیایەك كە لە گرێبەستەكەیدا هاتووە لە دهۆك 150 ملیۆن دۆلار وەك پڕۆژەیەكی ژێرخانی ئابووری دروستدەكات، بە سەرپەرشتی راستەوخۆی خۆی بۆ ئاو، كە پارەكەی نەداوە، لەبەرئەوەیە رێگە بە ناردنە دەرەوەی نەوت نەدراوە لەلایەن عێراقەوەو گرفتی بۆ دروستكراوەو حكومەتی عێراق مافی خۆی پێنەداوە لە پرۆسەی دەرهێنان و بەرهەمهێنان.

بەڵام سەرەڕای ئەوەش، ئێمە هەندێ هەمواركردنمان لە گرێبەستەكاندا كردووە، كە بەبێ مەرج هەندێ پڕۆژە بكەن. بۆ نموونە كۆمپانیای KNOC پشتیوانی دوو پڕۆژەی كارەبا دەكات لە هەرێمی كوردستان بە بڕی 700 ملیۆن دۆلار، كە پڕۆژەكە راستەوخۆ لە رێگەی كۆمپانیاكەوە دەكرێت لە رێگەی كۆمپانیای جێبەجێكراوە كە كۆمپانیای (یۆسكۆ)یە و گرێبەستی رۆژی 6/8/2012 لە هەولێر لەلایەن سەرۆكی حكومەتی هەرێمی كوردستان و ئەو دوو كۆمپانیایەوە ئیمزاكرا.

روونكردنەوەی داهات و خەرجییەكان
وەك ئەركێك و لەسەر بڕیاری سەرۆكی حكومەتی هەرێمی كوردستان هەموو داهاتەكانی نەوت و چۆنیەتی خەرجكردنی بۆ پەرلەمان رووندەكرێنەوە لە ماوەیەكی نزیكدا. كە ئەوەش چۆنیەتی خەرجكردنی داهاتی گرێبەستەكانی رابردوو و نوێیەكانیش دەگرێتەوە. هەروەها بە وردی روونیدەكەینەوە بۆ پەرلەمان كە چەند پارە خەرجكراوە لەو داهاتە و چەندی ماوە و چۆن خەرجدەكرێت.

هەروەها دەمەوێ ئەوەش روونبكەمەوە، كە لەو هەڵمەتە چەواشەكاریەدا هێرشدەكرێتە سەر ئەوەی كە پارە لە حیسابی بانكی لە بەریتانیا دانراوە نەك لە كوردستان. پێش هەموو شتێك بانكی HSBC یەكێكە لە بانگە ناسراوەكانی جیهان لەڕووی متمانە و ئیعتیبارەوە. لەساڵانی 2008 و 2009 دا، سیستەمی بانكیی لە كوردستان زۆر خراپبوو، گواستنەوەی پارەش بەپێی رێوشوێنی تایبەتە و نەدەكرا ئەو پارەیە بە نەبوونی سیستەمی بانكی بهێنرێتە كوردستان، بۆیە پارەكە لە حیسابێكی تایبەت بەناوی حكومەتی هەرێمی كوردستان دادەنرا، بەڵام ئێستا كە سیستەمی بانكیی لە هەرێمی كوردستان باشتربووە، پارەكە لە كوردستان وەردەگیرێت و هەڵدەگیرێت.

شەفافی گرێبەستە نەوتییەكانی هەرێمی كوردستان
یەكێكی دیكە لەو شتە ناڕاستانەی كە بۆ چەواشەكردنی خەڵكی كوردستان بڵاودەكرێتەوە ئەوەیە كە دەڵێن گرێبەستەكان بەبێ پرسی ئەو ئەنجوومەنە دەكرێن كە بەپێی یاسای نەوت و غازی هەرێمی كوردستان دیاریكراوە، كە ئەو ئەنجوومەنە لە سەرۆكی ئەنجوومەنی وەزیرانی هەرێمی كوردستان، جێگری سەرۆكی ئەنجوومەنی وەزیران، وەزیری سامانە سروشتییەكان، وەزیری دارایی، وەزیری پلاندانانی حكومەتی هەرێمی كوردستان پێكدێن. لێرەدا رایدەگەیێنین كە هەموو گرێبەستە نەوتییەكان بە ئاگاداری ئەو ئەنجوومەنە دەكرێن. زیاتر لەوەش هەموو هەمواركردنێكی هەر گرێبەستێكیش بە ئاگاداری ئەو ئەنجوومەنە كراوە.

هەروەك بەڕێز سەرۆكی حكومەتی هەرێمی كوردستان رایگەیاند كە گرێبەستە نەوتییەكانی ئێمە بە شەفافی تەواوەوە كراون و هیچ كێشەیان تێدا نییە. هەروەها سەرەڕای رێگری و گوشارەكانی بەغداش، كە هەستیارییەكی تەواوی دروستكردووە، بەڵام لەگەڵ ئەوەشدا بە قەدەر شەفافی وڵاتانی دیكە، گرێبەستەكانی هەرێمی كوردستان شەفافن و زۆریشیان بڵاوكراونەتەوە لە ماڵپەڕی حكومەتی هەرێمی كوردستاندا.

هەروەها پێداگیری حكومەتی عێراق لەسەر ئەوەی كە پێویستە هەرێمی كوردستان نەوت لە رێگەی بۆڕی نیشتیمانی عێراقەوە بنێرێتە دەرەوە، دانپێدانانێكی بەكردەوەیە بە راستی و دروستی گرێبەستە نەوتییەكانی هەرێمی كوردستان، چونكە ئەو نەوتەی كە عێراق داوامان لێدەكات بینێرینە دەرەوە، بەرهەمی ئەو گرێبەستە نەوتییانەیە.

سندوقی داهاتە نەوتییەكان
سەبارەت بە كردنەوەی سندوقی داهاتە نەوتییەكانیش لە وەزارەتی دارایی هەرێمی كوردستان، پڕۆژە یاساكەی لەسەردەمی كابینەی شەشەم دا ئامادەكراوەو پەسەندكراوە. پڕۆژەكە دوای ئەوەی پێداچوونەوەی بۆكرا لەلایەن وەزارەتی پلاندانان و وەزارەتی دارایی و ئەنجوومەنی وەزیران، ئێمە دوای رەچاوكردنی ئەو گۆڕانكاری و تێبینیانەی ئەوان، ناردمانەوە بۆ ئەنجوومەنی وەزیران و لەوێش پەسەندكرا، ئەوەش ماوەیەكی پێچوو. بەڵام لەكاتی ناردنی لەلایەن ئەنجوومەنی وەزیرانەوە لەسەردەمی كابینەی شەشەم دا، بەهۆی هەڵەیەكی ئیداری، پەرلەمان قەبووڵینەكردبوو. ئێستاش ئەو پڕۆژەیە و پڕۆژە یاسای كۆمپانیای نەوتی نیشتیمانیی هەرێمی كوردستان و پڕۆژەی یاسای مەعدەنە فلزییەكان و نافلزییەكان، لەلایەن وەزارەتەكەمانەوە ئامادەكراون بۆ ئەوەی بنێردرێن بۆ پەرلەمانی هەرێمی كوردستان.

گرێبەستەكانی پێشتریشمان هەمواركردنەوە
پێش پەسەندكردنی دەستووری عێراق و پێش دەرچوونی یاسای نەوت و غازی هەرێمی كوردستان، هەندێ گرێبەستی نەوتیی لە هەرێمی كوردستان كرابوون، ئێمە هەموو ئەوانیشمان هەمواركردن، دوای ئەوەی لە ساڵی 2006 وەك وەزیر لە هەرێمی كوردستان دەستبەكاربووم لە كابینەی پێنجەم دا. بەپێی یاسای نەوت و غازی هەرێمی كوردستان، پێداچوونەوەمان بەو گرێبەستانەدا كرد و هەموارمان كردن.

یەكێك لەو گرێبەستانە كە كاتی خۆی بە ئاسانكاری بەڕێز نەوشیروان مستەفا كرابوو، گرێبەستێك بوو لەگەڵ كۆمپانیای وێسترن زاگرۆس. كە جگە لەو هەموو ئاسانكارییە زۆرەی بۆ كۆمپانیاكە كرابوو، بڕی 5%یش وەك پشك بۆ دوو كەسی خەڵكی عێراق دانرابوو لە گرێبەستەكەدا، كە ئێمە دوای پێداچوونەوەی گرێبەستەكە لە چەند شوێنێكدا هەموارمان كرد و، ئەو 5%یەی لە گرێبەستەكەشدا بۆ دوو كەسەكە دانرابوو گێڕامانەوە بۆ حكومەت.

لێرەدا تەحەدای هەموو كەس دەكەم، شتێكی لەوجۆرە لەو گرێبەستانەدا هەبێت و بدۆزرێتەوە كە لەژێر سەرپەرشتی مندا كراون لە هەرێمی كوردستان. رێنماییەكانی سەرۆكی هەرێمی كوردستان و سەرۆكی حكومەتی هەرێمی كوردستان بۆ ئێمە هەمیشە ئەوەبووە كە ئەمانەتێكی گەورە و گرنگ لە ئەستۆی ئێوەدایە، دواڕۆژی وڵاتەكەمان بەشێكی بەندە بە باش بەڕێوەبردنی ئەو كارە. من خۆشم ئاواتم بووە، ئەو شارەزاییەی لە بواری نەوت و غازدا لە جیهان بەدەستم هێنا، رۆژێك لە رۆژان خزمەتی گەلەكەمی پێ بكەم لە كوردستان.

سووتەمەنی و كارەبا بۆ خەڵك
وەزارەتی نەوتی حكومەتی فیدرالیی عێراق، لەچەند ساڵی رابردوودا بەردەوام بەشی هەرێمی كوردستانی لە سووتەمەنی كەمكردووە، لەكاتێكدا پێویستییەكانی خەڵك لە هەرێمی كوردستان بەردەوام لەزیادبووندان . ئەوەش سەرەتای ئەمساڵ و دوو مانگ پێشتر گەیشتە نیمچە بڕینی تەواو. حكومەتی عێراق كە رۆژانە 700 هەزار بەرمیل نەوتی خاو لەهەردوو پاڵاوگەی بێجی و دۆرە بۆ پێداویستی ناوخۆیی خەڵكی عێراق دەپاڵێوێت، دەبێ بەپێی رێژەی 17%ی هەرێمی كوردستان، رۆژانە 135 هەزار بەرمیل لەو نەوتە بە بەرهەمە نەوتییەكانییەوە بداتە خەڵكی هەرێمی كوردستان. بەڵام ئێستا ئەوەی بۆ هەردوو پارێزگای هەولێر و سلێمانی دەینێرێت هەروەك ئەوەیە تەواوی بەشەكانی بڕیبێت، ئەوەی دهۆكیش كەمێك زیاتر، كە هەموو ئەو سووتەمەنییەی بۆ هەرێمی كوردستانی دەنێرێت ناگاتە 15 هەزار بەرمیل رۆژانە، كە بەشی پێویستی رۆژانەی هەرێمی كوردستان بەهیچ شێوەیەك لە 120 هەزار بەرمیل كەمتر نییە.

بۆ پرۆسەی دابەشكردنی سووتەمەنی بەسەر هاووڵاتیاندا لەساڵی رابردوودا كە لە مانگی ئابەوە دەستیپێكرد تاوەكو نەورۆزی ئەمساڵ، 500 ملیۆن لیتر نەوتی سپی بەسەر هاووڵاتیانی هەرێمی كوردستاندا دابەشكرا، پرۆسەی ئەمساڵیش كە لەو مانگەوە دەستپێدەكات تاوەكو نەورۆزی ساڵی داهاتوو، 740 ملیۆن لیتر نەوت بەسەر هاووڵاتیاندا دابەشدەكەین، كە نەوتەكە لە بەرهەمی هەرێمی كوردستانە . بەرمیلێك نەوت بە خۆڕایی دەدرێتە هەموو خێزانێك كە كۆبوونی خۆراك و سووتەمەنی هەبێت. بەشێوەیەك كە گوندنشینەكان چوار بەرمیل نەوتیان پێدەدرێت و شارنشینانیش سێ بەرمیل نەوت. جگە لەوە سووتەمەنی بۆ پڕۆژە پیشەسازییەكانیش دابین دەكەین، هەروەها بەنزینێكمان خستووەتە بازاڕی ناوخۆییەوە كە نرخ و جۆرەكەی لە زۆر لەو جۆرە بەنزینە بازرگانیانە باشترە كە لە هەرێمی كوردستان دەفرۆشرێن.

هەروەها لەڕووی دابینكردنی كارەباشەوە، پێش هەمووان وەزیر و پەرلەمانتارانی عێراق شاهێدن لەسەر سەركەوتنی وەزارەتی سامانە سروشتییەكان و حكومەتی هەرێمی كوردستان لە دابینكردنی كارەبا بۆ خەڵكی هەرێمی كوردستان، بەهاوكاری سەرمایەدارانی نیشتیمانی ناوخۆیی. لەوبوارەشدا پڕۆژەی ستراتیژی زۆر گەوەرە بە رێگەوەن، بەشێوەیەك كە پێویستی خەڵكی كوردستان لە كارەبا بەتەواوی دابیندەكات. ئێستاش مایەی خۆشییە بۆ ئێمە كە توانیومانە كارەبا بدەینە خەڵكی خۆشەویستی كەركووك و خەڵكی دەوروبەری هەرێمی كوردستانیش.

دژایەتی چی دەكەن
بەڕێز نێچیرڤان بارزانی، سەرۆكی حكومەتی هەرێمی كوردستان هەر لەكاتی كابینەی پێنجەمدا سیاسەتی پشتبەستن بە بەرهەمی ناوخۆیی لە سووتەمەنی و كارەبا، وەك ستراتیژێك و بەرنامەی كار خستە بەردەم ئێمە. نێچیرڤان بارزانی، بۆ دروستكردنی سەربەخۆییەك لە دابینكردنی خزمەتگوزارییە سەرەكییەكانی وەك سووتەمەنی، كارەبا و ئاو، هەروەها بۆ راكێشانی وەبەرهێنانی بیانی و دڵگەرمكردنی خەڵكی كوردستان لە ئاوەدانكردنەوەی كوردستان، ئینجاش بۆ دابینكردنی گرەنتی نێودەوڵەتی و فراوانكردنی ناو و پێگەی هەرێمی كوردستان، بەدرێژی ئەوەی لەگەڵ باسكردین. بەڕاستیش ئەوە ئەو خەونە بوو، كە من ساڵەها بوو بۆی دەژیام و خۆم بۆی فێردەكرد.

جگە لە رێگرییە دەرەكییەكان، گرفتە ناوخۆییەكانیش زۆربوون، تەنانەت ترسێكی بەردەوام دروستدەكرا، بەڵام بوێری بەڕێز نێچیرڤان بارزانی و هاوكاری جێگرەكانی بۆ رووبەڕووبوونەوە لەپێناو خۆشگوزەرانكردنی خەڵكی كوردستان و بە سوود وەرگرتن لە مافە دەستوورییەكانمان، كارمان دەستپێكرد و بە گوڕتركرد. ئێستا هەر كەسێك بە ویژدانەوە سەیری بارودۆخەكە بكات، دەزانێ سیاسەتی نەوتیی هەرێمی كوردستان سەركەوت و كاریگەری پۆزەتیڤی خۆی لەسەر سیاسەت و بەهێزبوونی پێگەی هەرێمی كوردستانیش دروستكردووە.

ئێمە كە سووتەمەنی، كارەبا و ئاومان بەو سیاسەتە نەوتییە دابینكرد، هەروەها سەركەوتین لە هێنانی گەورەرترین كۆمپانیا نەوتییەكانی جیهان، هەروەها سەركەوتین لە دروستكردنی ناو و پێگەیەكی دیار بۆ هەرێمی كوردستان، جۆرێك لە سەربەخۆیی بۆ ئیرادەی بڕیاردانی سیاسیمان بۆ هەرێمی كوردستان دابینكرد، هەروەها پەیوەندی فراوانمان لە رێگەی سیاسەتی نەوتییەوە بۆ هەرێمی كوردستان دروستكردووە، بۆچی راگەیاندنی بزووتنەوەی گۆڕان هاوشێوەی حوسێن شەهرستانی و تووندتریش هێرشیدەكاتە سەر، ئەوە بۆ بەرژەوەندی كێ دەكات و كێ پێیگوتووە؟ باشە سیاسەتی گۆڕان چی دەبوو ئەگەر لەو بارودخەی ئێمەدا لە دەسەڵاتدابووایە؟ ئایا ئەوەندەی ئێمەی پێدەكرا بۆ هەرێمی كوردستان؟

بزووتنەوەی گۆڕان لەجیاتی ئەوەی دەستخۆشی لە وەزارەتی سامانە سروشتییەكان بكات، رێز لەو دەستكەوتە نیشتیمانیانەی حكومەتی هەرێمی كوردستان بگرێت، هێرشی دوژمنكارانەی دەكاتە سەر، كە ئەو هێرشانە بەهەموو شێوەیەك لەسنووری رەخنەلێگرتن تێپەڕیون. بەبێ ئەوەی بزووتنەوەی گۆڕان و راگەیاندنەكەی یەك رەخنە لە حكومەتی عێراق و وەزارەتی نەوتی عێراق و بەڕێز حوسێن شەهرستانی بگرن كە ئەوە چەند ساڵە خەڵكی هەرێمی كوردستان لە مافی خۆی لە سووتەمەنی بێبەشدەكات، كە دەكاتە بایی چەندین ملیار دۆلار.

من كە لەسەر راسپاردەی بەڕێز سەرۆكی حكومەتی هەرێمی كوردستان سەردانی بەڕێز نەوشیروان مستەفا، سەرۆكی بزووتنەوەی گۆڕانم كرد، هەموو شتێكم لە چوار سەعاتدا بە تەواوی بۆ روونكردنەوە، وەڵامی پرسیارەكانی ئەوانیشم دایەوە. ئەوەشم پێگوت كە من تەنیا چاوم لە یەك شتە ئەویش سەركەوتنی نەتەوەو وڵاتەكەمە، ویژدانم ئاسوودەیە كە ئەوەی دەیكەم و كردوومە لە حكومەتی هەرێمی كوردستاندا بە پاكی و زانایی بووەو بۆ بەرژەوەندی هەرێمی كوردستان بووە.

ئێستاش پرۆسەكە بەهۆی هاتنی كۆمپانیا هەرە گەورەكانی جیهانەوە بۆ كوردستان، زۆر گەورەبووە، كوردستان پێگەیەكی نێودەوڵەتی وەردەگرێت، ئەوەش خەونی شەهیدانمان بووە، خەونی خەڵكی دڵسۆزی ئێستای كوردستانیشە. هاتنی ئەو كۆمپانیا گەورانە، كە بەهۆی سیستەمی وڵاتەكانیانەوە بە شەفافی كاردەكەن، بڕواو متمانەیەكی زیاتر بە كوردستان و پرۆسەی نەوتیی هەرێمی كوردستان دەبەخشن.

هەروەك سەرۆكی حكومەتیش گوتی، بۆ ئەو سیاسەتە بە ئەركی خۆمانی دەزانین بەردەوام پێشیبخەین، هەروەها بەرامبەر هەموو دۆلاریكیش خۆمان بە بەرپرسیار دەزانین هەرچی لەژێر سەرپەرشتی ئێمەدا كرابێت. زۆرم پێناخۆشە كە دەبیستم، كە گوایە گۆڕان بەنامە داوای لە بەڕێز حوسێن شەهرستانی كردووە بۆ ئەوەی یارمەتیان بدات بە پێدانی وێنەی مانگە دەستكردەكان لەبارەی دەروازە سنوورییەكان كە گوایە هەرێمی كوردستان نەوتیان پێدا دەنێرێتە دەرەوە.

ئێمە دەبێ وەك بنەما و هێزكاری بنەڕەتی بڕوانینە پرۆسەی نەوتیمان، نەك پەنا ببەینە بەر كەسانێك كە هەوڵدەدەن و دەیانەوێ هەموو شتێك لەسەر پرۆسەی نەوتیی هەرێمی كوردستان دروستبكەن، بۆ ئەوەی خەڵك و حكومەتی هەرێمی كوردستان نەبێتە خاوەنی بەرهەم و سیاسەتی نەوتیی خۆی. ئێمە سەردانی بەڕێز نەوشیروان مستەفامان كرد، ئامادەین جارێكی دیكەش بۆ ئەو و هەموو لایەنێكی تر سیاسەتەكەمان روونبكەینەوە، ئینجا چ پێویستدەكات پەنا ببەنە بەر خەڵكانی دوژمنی پرۆسەكە.

نەوت بابەتێكی تەخسوسییە، پێویستی بە شارەزاییە، نابێ بە زانیاری نادروست و چەواشەكاری، خەڵك لە دژی پرۆسەیەك هانبدرێت، كە زۆرترین سوودی بۆ خەڵكی هەرێمی كوردستان هەبووە و، ئایندەی گەشیشی هەر بەهۆی نەوتەوە و سیاسەتێكی راستی نەوتییەوە دەبێت بە پشتیوانی خوا.