جەعفەر ئیمینكی بۆ (گوڵان): تەنها ڕێگە بۆ رزگاركردنی پڕۆسەی دیموكراتی لەعیراقدا، لابردنی نوری مالیكی یە

Decrease font Enlarge font قەبارەی فۆنت
total views:    1267
image

ئێستا عیراق لەهەموو كاتێك زیاتر بە قۆناخێكی هەستیار و مەترسیداردا تێدەپەڕێت، پرۆسەی سیاسی كەوتۆتە قەیرانێكەوە كە رزگار كردنی ئاسان نییە و سەرۆك وەزیرانی عیراقیش لەبری ئەوەی پارێزەری دەستورو سیستمی دیموكراتی بێت لە عیراقدا خۆی بەرەو تاكڕەوی ملدەنێت و ماددەكانی دەستوور پێشێل دەكات و خۆی لە جێبەجێ كردنی رێككەوتنەكان دەدزێتەوە، ئێستا پێكهاتە سیاسیەكانی عیراق لەهەوڵی ئەوەدان بە ڕێگەی دەستووری و دیموكراتیانە چارەسەرێك بۆ ئەم بارودۆخە بدۆزنەوە، ئەو چارەسەرەش كە ئێستا بەگەرمی باسی لێوە دەكرێت، هەوڵدانە بۆ لێسەندنەوەی متمانە لەمالیكی، بۆ قسەكردن لەسەر ئەم قەیرانە و هەڵوێستی لایەنی كوردستانی بەگشتی و هەڵوێستی پارتی دیموكراتی كوردستان لەمەڕ ئەم كێشانە، ئەم پرسانەمان رووبەڕووی بەڕێز جەعفەر ئیبراهیم ئیمینكی ئەندامی مەكتەبی سیاسیی و وتەبێژی فەرمی مەكتەبی سیاسیی پارتی دیموكراتی كوردستان كردەوە و بەڕێزی راشكاوانە وەڵامی پرسیارەكانی گوڵانی دایەوە، ئەمەش دەقی دیمانەكەیە.

* لەسەرەتادا دەمانەوێت بزانین هەڵوێستی پارتی دیموكراتی كوردستان و حزبە كوردستانییەكان دەربارەی لێساندنەوەی متمانە لە مالیكی چۆنە؟
- دیارە ئێمە گرفتێكمان لە عیراق هەیە ئەویش لاوازی متمانەیە لە نێوان پێكهاتەكانی سەرەكی پڕۆسەی سیاسی لە عیراقی نوێدا، دیموكراسیەت لەسەر متمانە درووست دەكرێت و دیموكراسیەت هەم متمانە لەنێوان دەسەڵات و هاووڵاتی هەم متمانەشە لە نێوان هێزە سیاسیەكان و، هەم متمانەشە بەو ڕێنمایی و میكانیزمانەی بۆ چاسەركردنی كێشەكان دەگیرێتەبەر، بەڵام بەداخەوە لەبەر ئەوەی متمانەكە لاواز بووە، ئەمەش گرفتی سەرەكی پڕۆسەكە بووە، ئێمە وەك لایەنی كوردستانی لە پڕۆسەی سیاسیی عیراقدا خۆمان بە هاوبەش لە پرۆسە سیاسیەكە و خۆمان بە هاوبەشی پرۆسەی بونیادی دیموكراتی لە عیراق زانیوە، بۆ ئەوەی متمانە بگەڕێتەوە بۆ ناو پێكهاتەكان و عیراقی نوێ لەسەر ئەو متمانەیە بونیاد بنرێـتەوە، بەڵام ئێمەی كورد نابینە هاوبەشی بونیادی سیستمێك كە دوور بێت لەدیموكراتی یان لەڕێگەی دیموكراتی لابدات، بۆیە ئەوەی ئێمە دەمانەوێت ئەوەیە سیستمی دەوڵەتی عیراق دیموكراتی و فیدرالی و فرەیی و پەرلەمانی بیت، ئێستاش ئێمە دەمانەوێت ئەم سیستمە رزگار بكەین و بوار نەدەین بەرەو دیكتاتۆریەت بچێت لەبەر ئەوەی ئەمە سەرەتایەكی زۆر مەترسی دارە، بۆیە لە یەكەم رۆژی ئەم كێشەیەوە ئێمە تەنها دوو ڕێگەمان لەبەردەم بووە، یەكەمیان ئەوەبووە كە سەرۆك وەزیران مالكی ئاگادار بكەینەوە و هەلی باشمان خستە بەردەم بۆ ئەوەی چاكسازی بكات و بە كردەیی وەڵاممان بداتەوە، بەڵام وەڵامی نەداینەوە، بۆیە ئێمە پەنامان بۆ ڕێگە چارەی دووەم بردووە، ئەم ڕێگەچارەیەیش كە بریتییە لە سەندنەوەی متمانە لە مالیكی بۆتە تەنها ڕێگەچارەو لەمەش پاشگەز نابینەوە و هەوڵدەدەین هەموو ڕێگەی پێویست بۆ لێسەندنەوەی متمانە لە مالیكی بخەینە گەڕ، بۆ ئەمەش ڕێگایەك هەبوو بەپێی ماددەی 61 خاڵی سێیەم و پەڕەگراڤی 8 لەدەستوری عیراق كە لە ڕێگای سەرۆك كۆمارەوە داوای لێساندنەوەی متمانە بكرێت، بەڵام بە بۆچوونی بەڕێز مام جەلال و هەڤاڵانی تر لە هاوپەیمانی ئێمە ئەو ڕێگەیە پەسەند نەبووە، بێگومان ئێمە ڕێزمان بۆ هەڵوێستی ئەوان هەیە، ناڵێین تەنیا ئەم ڕێگەیە پێش بكەوێت، بەڵكو دەڵێین با متمانە لە مالیكی وەربگیرێتەوە، لەبەر ئەوەی نوری مالیكی ناتوانێت بەرنامەی تەوافوق و هاوبەشی نیشتمانی جێ بەجێ بكات، هەروەها حزبە كوردستانییەكانی تریش لە پەرۆشی ئەوەدان كە بارودۆخی عیراق چارەسەر بكرێت، بەڵام پرسیار ئەوەیە چۆن چارەسەر دەكرێت؟ بێگومان ئێمە وەك پارتی دیموكراتی كوردستان پێمان وایە دەرفەتی زۆر دراوە بەمالیكی و ئیتر پێویست نییە دەرفەتی دیكەی پێ بدەین. بۆ ئەمەش ئێمە داوای ئەوەمان نەكردووە كە سەرۆك وەزیران لە هاوپەیمانی نیشتمانی وەربگیرێتەوە، بەڵكو داوامان كردووە مالیكی لابرێت و یەكێكی دیكە لە هاوپەیمانی نیشتمان كاندید بكرێت بۆ ئەو پۆستە، ئەمەش لەبەر ئەوەیە كە نوری مالیكی هۆكاری ئەوەبووە ئەنجوومەنی وەزیرانی عیراق لەكاربكەوێت، ئێستاش ئەنجوومەنی وەزیران پەكی كەوتووە.

* لێساندنەوەی متمانە لە نوری مالیكی بۆتە هەوڵێكی هەمە لایەنەی پێكهاتە سیاسیەكان، ڕاستە لەناوە پێكهاتەكانیشدا هەندێك بۆ چوونی جیاواز هەیە، بەڵام بەشێوەیەكی گشتی ئەم مەسەلەیە بۆتە مەسەلەیەكی جیدی، ئایا تا چەند مەزندە دەكەن ئەو پڕۆسەیە سەركەوتوو بێت؟
ــ من دەڵێم ئەوە بەشێكە لەپڕۆسەی گشتی، پڕۆسەی كاراكردن و چاككردنی سیستەمی حوكمڕانی لە عیراقدا ئەمە بەشێكە و هەنگاوێكی گرنگە، بێگومان هەموو لایەك ئاگاداری دەستپێشخەریەكەی سەرۆك بارزانین كە ئەو دەستپیشخەرییە بووە هۆكاری ئەوەی عیراق لە قەیرانێكی گەورە رزگاری بكرێت، هەموو جیهان دەزانێت دوای 9 لە هەڵبژاردنەكانی مارتی 2010 نەتوانرا حكومەت پێكبهێنریت و عیراق بەبێ دەسەڵاتی جێبەجێكردنی هەڵبژێراو بوو، بۆیە گرنگە هەموو لایەك بایەخ بە هەڵوێستی كورد بدەن بۆ رێكخستنەوەی پرۆسەی سیاسیی لە عیراقدا و ئەو دەستپێشخەریە نەبوایە عیراق دەكەوتە قەیرانێكی جدیەوە، بۆیە لێرەدا مەسەلەكە ئەوەنییە ئەو پرۆسەیە سەردەكەوێت یان نە، بەڵكو ئێمە دەڵێین هەموو هەوڵێك دەخەینەگەڕ بۆ ئەوەی سەربكەوێت، چونكە سەركەوتنی ئەو هەنگاوە سەركەوتنی پڕۆسەی دیموكراسییە لە عیراقی نوێدا و لە پێناوی ئەوەدا ئێمە چاومان لەهەموو هێزەكانی نیشتمانییە كوردستانی و عیراقی و شیعی وسوننی و بەڕاستی بەستایشێكی زۆرەوە تەماشای ڕۆڵی بەڕێز موقتەدا سەدر دەكەین كە ڕۆڵێكی یەكجار دیاری هەیە لەوەدا كە باش لەوە تێگەیشتووە هەنگاوەكانی نوری مالكی پێچەوانەی سیستەمی دیموكراسییە و تاكڕەوی ئەوەندە پێوەدیارە كە مرۆڤ لێی دەترسێت، هاوكات وایكردووە پێكهاتەیەكی زۆرو سەرەكی ئەو وڵاتە كە سوننەیە پەراوێز بخرێت و، لەمەش زیاتر لایەنی كوردی نەك پەراوێزكردووە، بەڵكو نیگەرانی كردووەو، هەموو ئەو رێككەوتنانەی ئیمزای لەسەر كردوون هیچی جێبەجێ نەكردوەو جێبەجێشیان ناكات.
* ئێستا باس لەوە دەكرێت بۆچوونی سەرۆك كۆمار بۆ لێسەندنەوەی متمانە لە سەرۆك وەزیران جۆرێكی دیكەیە، واتە سەرۆك كۆمار لەگەڵ لێساندنەوەی متمانە نییە، ئایا بەحوكمی ئەوەی سەرۆك كۆمار جەنابی مام جەلالە و سكرتێری یەكێتی نیشتمانی كوردستانە، ئایا تاچەند ئەو جیاوازییە ڕەنگدانەوەی لەسەر پەیوەندییەكانی پارتی و یەكێتی هەبووە؟
- پێش هەموو شتێك ڕۆڵی بەڕێز جەنابی مام جەلال وەكو سكرتێری یەكێتی نیشتمانی كوردستان و سەرۆك كۆماری عیراق ڕۆڵێكی یەكجار گرنگی هەبووە بۆ بنیادنانی عیراقی نوێ و هەروەها بۆ تێپەڕاندنی قۆناخێكی هەستیار و ناسكی هەرێمی كوردستانیش، ئەمەش ڕاستیەكە و دەبێت ئاماژەشی پێ بكرێت، هەروەها هاوپەیمانی ستراتیژی نێوان پارتی و یەكێتی بناغەیەكە بۆ پێشكەوتنی هەرێمی كوردستان و بناغەیەكە بۆ ئەوەی كورد بتوانێت ڕۆڵی خۆی لە عیراقی نوێدا بگێڕێت، بۆیە ئێمە وەك پارتی دیموكراتی كوردستان تێگەیشتنی تەواومان بۆ ئەو هەڵویستەی مام جەلال هەیە و ڕێزمان بۆی هەیە، ئەوەشی وا دەكات هەندی جار لەهەندێ بوار نیگەران بین، ئەوە پەیوەستە بەوەی هاوسەنگی هێز لەبەغدا بەلای لایەنێكدا نەشكێتەوە كە باوەڕی بە دیموكراسی نییە، ئەگەر نا ئێستا سەركردایەتی پارتی و یەكێتی پەرۆشی ئەوەن ئەو بارودۆخەی عیراق تێیكەوتووە رزگاری بكەن، بۆ ئەمەش هەماهەنگی و دیاڵۆگ و گفتوگۆ و كۆبوونەوەی هاوبەش لەنێوان هەردوولا هەیە و بەردەوامیش دەبێت و بەرپرسیاریەتێكی هاوبەش لەسەرشانی جەنابی مام جەلال و جەنابی سەرۆك بارزانی هەیە بۆ ئەوەی بەڕاستی ئەو بارودۆخەی لە عیراق هەیە چارەسەر بكرێت و هەردوولایان ئەو بارودۆخە بەگرفت دەزانن. بەڵام بە حكومی ئەوەی بەڕێز مام جەلال سەرۆك كۆماری عیراقە و كەس خوازیاری ئەوە نییە سەرۆك كۆمار ببێتە بەشێك لە كێشەكە، بێگومان سیستمی پەرلەمانی دوولایەنەیە، واتا سەرۆك كۆمارو سەرۆك وەزیران بەستراونەتەوە بە یەك سیستمەوە، سیستمی دەسەڵاتی جێبەجێكردنە كە پێكەوە بەستراون و نامانەوێت ئەو سیستمە تووشی مەترسی ببێتەوەو نامانەوێت كشانەوەی متمانە لەسەرۆك وەزیران ببێتە هۆی لێسەندنەوەی متمانە لەسەرۆك كۆمار. لەبەرئەوە تێگەیشتنێكی تەواومان هەیە بۆ ئەو هەڵوێستەو باش تێدەگەین و هەوڵ دەدەین هەردوو مەكتەبی سیاسی پارتی و یەكێتی كاراتر لەجاران و ئەو گرنگیەی بەم كێشەیە دەدرێت زیاتر بكرێت، بۆ ئەوەی بتوانین بگەیەنینە چارەسەرێك و بتوانین لەگەڵ هاوپەیمانانی تر لەعیراق هەنگاوەكان بەئاراستەیەكی وا بچن بتوانین ئەو ئامانجە كە بەئامانجێكی ڕەوای دەزانین سەرۆك وەزیران ئاڵوگۆڕ بكرێت لەچوارچێوەی هاوپەیمانی نیشتمانی نەك بەشێوەیەكی تر، ئەمە چارەسەرێكە لەبەرژەوەندی ئەم سیستمەیە.
* هەموو چاودێران لەسەر ئەو ڕایە هاوكۆكن ئەگەر رێكەوتنی هەولێر جێبەجێ بكرایە قەیرانی عیراق نەدەگەیشتە ئێستا بۆیە بەڕای ئەو چاودێرانە چارەسەر بەشێوازی دیالۆگ و گەیشتن بەڕێكەوتن لەگەڵ سەرۆك وەزیران هیچ زامنێكی نییە هەربۆیە ناكرێت دیالۆگ بكرێت و رێكەوتن ئیمزا بكرێت و دواتر جێبەجێ نەكرێت، ئایا ئەم لایەنە تاچەند لایەنە عیراقیەكانی بێ ئومێد كردووە؟
- دەبێت زەمانەتی هەموومان پابەندبوون بەدەستوور بێت و مەرجەعیەت لەعیراقدا دەسەڵاتی یاسادانانە، ئەوەی ناتوانێت رێكەوتنەكان جێبەجێ بكات دەبێت موسائەلە بكرێت لەلایەن پەرلەمانەوە، دوو ڕێگامان هەیە پرسیارو ئیستجوابە، دەبێت ئەم دوو ڕێگایە لەلایەن پەرلەمانەوە كارا بكرێت . دەبێت ئەو فشارەی كە ئێستا لەسەر پەرلەمان هەیە لاببرێت، ئەمەش بەشێكە لەو مەترسیانەی كە ئێمە باسی لێدەكەین، كە ئێمە باسی ئەوە دەكەین كە بەراستی بڵێین دیموكراسیەت لەعیراق بوونی هەیە دەبێت سەرۆك وەزیران ملكەچی پەرلەمان بێت. كاتێك پرسیار دەكرێت دەبێت وەڵام بدرێتەوە كە لێپرسینەوەی لەگەڵ دەكرێت بچێتە بەردەم پەرلەمان وەڵام بداتەوە نەك كارتی فشار لێرەو لەوێ بەكاربهێنێت، ئەوەی ئێمە باسی لێوەدەكەین بەڵگە لەبەردەستمانە كە بەڕێز نوری مالیكی بەڕاستی چاو سووركردنەوە لەپەرلەمان و پەرلەمانتاران دەكات، ئەمە جگە لەوەی لەدەستوور لایداوە كە لەمەش دا بەڵگەمان لەبەردەستدایە، بۆچوون و تێڕوانینەكانی ئێمە بۆ ئەو هەوڵانەی كە لەلایەن هاوپەیمانی كوردستانییەوە دەنرێت لەپێناوی ئەوەی ئاڵووێری لەپۆستی سەرۆك وەزیران بكرێت ئومێد بەخەڵكی و گەلانی عیراق و هێزە سیاسییەكان دەبەخشێت، ئەمە دەبێتە نموونەیەكی زیندوو زۆر كاریگەر لە ئایندەی دیموكراسی لەعیراقدا، مانای ئەوەیە كاتێك سەرۆك وەزیر نەتوانێت پابەند بێت بەرێكەوتنێكی سەرەكی كە رێكەوتنی هەولێرە و بەشێوەیەكی ئاشكرا سەرپێچی لەبەندەكانی دەستوور بكات، ئەمە دەبێتە وانەیەك بۆ هەر سەرۆك وەزیرانێكی داهاتوو، لەوە تێدەگات ئەگەر پابەند نەبێت بەدەستوور لەلایەن پەرلەمانەوە لێپرسینەوەی لەگەڵ دەكرێت، كاتێك رێكەوتنێكی سەرەكی كەبەشێكە لەپرۆسەی سیاسی لەعیراقدا پێشێل بكات، ئەوا پەرلەمان دەتوانێت ئیستجوابی بكات، بەتێڕوانینی من ئەمە هەمووی ئومێدبەخشن بۆ ئەوانەی چاودێری سیاسی لەعیراق دەكەن.
* هەندێك مەترسی ئەوەیان هەیە پرۆسەی متمانە وەرگرتنەوە لە مالیكی بارودۆخەكە ئاڵۆزتر بكات، لەبەرئەوەی مەزەندە ناكرێت سەرۆك وەزیران قبووڵ بكات متمانەی لێوەربگیرێتەوە، ئایا تاچەند ئەم بارودۆخە هەڕەشەی لەكۆی پرۆسە سیاسیەكە لەعیراق دەكات ؟
- ئەمە هەمووی بەڵگەیە بۆئەوەی ئەمەی ئێمە باسی لێوەدەكەین بەڵگەیە بۆ ئەوەی ئێمە دەڵێین سیستمی حوكمڕانی لە عیراق دەخلیسكێتەوە بەرەو دیكتاتۆرییەت، ئەگینا ئێمە لەوڵاتێكی دیموكراسی نابێت بەو ئاراستەی بچین، ئەوەتا تەماشای وڵاتانی دنیا بكە كە سەرۆك وەزیر ناتوانێت پرۆژەیەكی دەستپێوەگرتنەوەی خەرجییەكان جێبەجێ بكات بەپێچەوانەوە دەست لەكاردەكێشێتەوە ئەوەتا لەیونان و ئیسپانیاو وڵاتانی تر دەیبینین كە زۆر ئاساییە سەرۆك وەزیران دەست لەكاركێشانەوەی خۆی راگەیەنێت بۆ لای ئێمە وایلێبێت كاتێك باس لەسەندنەوەی متمانە بكرێت، مەترسی ئەوە هەبێت سەرۆك وەزیران كودەتا بەسەر دیموكراتی بكات و هەڕەشە بكات، ئەمە قسەكانی ئێمە دەسەلمێنێت كە بۆچوونی ئێمە راستەو مەترسی ئەوەمان هەیە عیراق بەرەو دیكتاتۆرییەت بچێت، ئەگینا لەهیچ سیستمێكی دیموكراتیەت نەبووە سەرۆك وەزیران بڵێت واژووی پەرلەمانتار ساختەو تەزویرە ئەوە كەی كاری ئەوە ئەو ئیشی دەسەڵاتی یاسادانانە، كاری ئەوانە بپرسن پەرلەمانتار حازر دەبێت یا نابێت سەرۆك پەرلەمان لێی دەپرسێتەوە بەپێچەوانەوە سەرۆك وەزیران بۆی نییە دەست لەم پرۆسەو كاروبارە وەربدات، لەبەر ئەوە من دڵنیام سەرۆك وەزیران لە پرۆسەیەكی دیموكراسی دا لەئەنجامی ئەم ئیستجوابەدا لاببرێت، ئەمەش دەبێتە وانەیەك لەمێژووی سیاسی عیراقدا كە كەسێكی تر نەوێرێت وا بەئاسانی دەستوور تێپەڕێنێت و پێشێلی رێكەوتنەكان بكات .
* لەم بارودۆخەدا مەترسیەكی سەرەكی لەسەر پرۆسەی دیموكراسی لەعیراقدا هەیە، ئەم مەترسیەش وەك خاڵی هاوبەش هەموو لایەنەكانی كۆكردۆتەوە، پرسیارەكە لێرەدا ئەوەیە تاچەند دەتوانین ئەم مەترسیە لەسەر پرۆسە دیموكراتیەكە دووربخرێتەوە؟
- ئەوە دەگەڕێتەوە بۆ بڕوای هێزە سیاسیەكان بەپرۆسەی سیاسی، ئێمە لەو قەناعەتەین هێزە سیاسیەكانی عیراقی كۆكن لەسەر ئەوەی كەسیستمی دیموكراسی تاكە ڕێگایە بۆ ئەوەی عیراقی ئێستا وەكو خۆی بمێنێت، یەكپارچەیی گەلان و خاكی عیراق بەوەوە بەستراوە، ئەمە دیپاچەی دەستووری عیراق ئەمەی تۆماركردووە كە ئەمانە هەمووی بەستراونەتەوە بەوەی سیستمی دیموكراتی وەكو پێویست كاربكات و ئەو سیستمە پەكی نەكەوێت، لێرەدا ئێمە بڕوامان بەوە هەیە ئەمە لەبەرژەوەندی هەموو پێكهاتەكانی عیراقە بە(سوننەو شیعەو كورد)ەوەیە كە سیستمی دیموكراتی لەعیراقدا بەردەوام و كارا بێت و لەجاران باشتر بەڕێوەبچێت، لەپێش هەمووشیەوە ئاڵوگۆڕكردنی دەسەڵات بەڕێگایەكی دیموكراسی و ئاشتیانە، ئەمە كۆڵەگەی سەرەكی سیستمی دیموكراسیی و حوكمڕانییە لەم سیستمەدا، لەبەرئەوە ئێمە لەو قەناعەتەین دنیای دیموكراسی بەو ئاڕاستەیە دەچێت و تەنانەت ئەوانەی بڕوایان بەدیموكراسیەتیش نەبوو ئێستا ئەو ڕێگایەیان پێڕەوكردووە، كەچی چەندین ساڵە گەلانی عیراق و هێزە سیاسییەكانی خەبات دەكەن لەپێناو بەدەستهێنانی سیستمێكی دیموكراسی، بەدیهێنانی ئەمە بەبڕوای من مومكینە و دەبێت ئەم پرۆسەیە سەربكەوێت .
* پرۆسەی سیاسی عیراق لەسەر بنەمای تەوافوق پێكهاتووە و حكومەتیش لەسەر بنەمای شەراكەتی نیشتمانی دامەزراوە، بەڵام ئێستا درك بەوە دەكرێت ئەو دوو بنەمایەی تەوافوق و شەراكەتی نیشتمانی كاری پێ ناكرێت، ئایا چۆن دووبارە بەم دوو میكانیزمە دەكرێت پرۆسەكە رێكبخرێتەوە؟
- كار نەكردن بەهەردوو بنەمای تەوافوق و شەراكەتی نیشتمانی گرفتی ئێمەیە لەگەڵ نوری مالیكی، ئێمە دەڵێین كشانەوەی متمانە لە نوری مالیكی دەرگایەكە بۆ ئەوەی بتوانین جارێكی تر لەسەر بنەمای شەراكەت ئەنجومەنی وەزیرانی عیراق كارەكانی خۆی بەڕێوەببات، كە ئێستا تەنیا شەراكەتێكی شكڵی هەیە، لەكاتێكدا جەوهەری شەراكەت نەماوەو بڕیارەكان لەئۆفیسی شەخسی سەرۆك وەزیرانەوە دەردەچێت و لەئەنجومەنی وەزیرانی عیراق وەرناگیرێت، تەنانەت لەگرێبەستەكانی نەوتیش شەهرستانی فێربووە لەنووسینگەكەی خۆی و بەتەنیا لەگەڵ كۆمپانیا پێترۆڵیەكان دادەنیشێت و گرێبەستەكان مۆردەكات، لەكاتێكدا وا پێویستە لەئەنجومەنی وەزیران ئەو دانیشتنانەو گرێبەستانە مۆر بكرێت، دۆسیەی ئەمنیش لەئۆفیسەكەی بەڕێز نوری مالیكی بەڕێوەدەبرێت، لەكاتێكدا ئەگەر پرانسیپی شەراكەت هەبێت دەبێت لەئەنجومەنی وەزیران باس بكرێت. هەربۆیە ئێمە دەڵێین هەردوو مەبدەئی تەوافوق لەناو پەرلەمان و شەراكەتی نیشتمانی لەحكومەتدا تاكە زامنی بەرەوپێشچوونی پرۆسەی دیموكراتییە لەعیراقدا، گەڕانەوەی ئەم دوو پرانسیپەش بۆ ناو پرۆسە سیاسیەكە تەنها بەلادانی مالیكی دەبێت.
* ئایا ئێمە وەكو كورد كەچەندین ساڵە چەندین ڕێگامان تاقیكردنەوە ئەگەرهاتوو سیستمی تەوافوق و شەراكەت رێكنەخرایەوەو نوری مالیكی قبووڵی نەكرد ئایا ئێمە وەكو كوردو دەسەڵاتی سیاسی قسەیەكی ترمان هەیە؟
- گەلی كوردستان لەعیراقدا زۆر مەینەتی بەسەردا هاتووە و وەكو ژمارەش ژمارەیەكی كەم لەپێكهاتەی عیراق پێك دەهێنین، لەرووی مێژوویشەوە نەگبەتترین پێكهاتەی عیراق كورد بووە، لەبەرئەوە كاتێك ئێمە دەنگی خۆمان بەرز دەكەینەوەو پێش هەموو خەڵكی تر مەترسیەكان دەوروژێنین لەو روانگەیەوە هاتووە نامانەوێت هەمان مێژوو لەم وڵاتە خۆی دووبارە بكاتەوە و بەنەفسێكی دیكتاتۆری و تاكڕەو لەبەغدا حوكم بەڕێوەببرێت، لەبەرئەوە لەپەڕۆشی و دڵسۆزی ئێمەیە و لەچوارچێوەی ئەو ئەخلاقیەتەی كە بڕوامان پێیەتی داوای ئێمە لەبەڕێز نوری مالیكی ئەوەیە : چیتر گەمە بەسیستمی دیموكراسی لەعیراق نەكات، ئەو مەترسیەشی كە ئێستا لەسەر سیستمی دیموكراسی لەعیراقدا هەیە، ئەوا پێویستە ئەگەر مالیكی وەك كەسایەتیەكی سیاسی بەپەرۆشە بۆ دیموكراسیەت لەعیراقدا ئەوا دەبێت خۆی داوای دەست لەكاركێشانەوەی بكردایە، بۆیە داوای دەستلەكاركێشانەوە باشترین ڕێگایە بۆ ئەوەی سیستمی دیموكراسیەت لەم وڵاتەدا رزگاری بێت، ئەو كاتەش بەڕێز نوری مالیكی لەلایەن گەلانی عیراقەوە بە چاوێكی دیكە سەیر دەكرێت.