گۆڤاری "Foreign Policy": توركیا بۆی ده‌ركه‌وت هه‌رێمی كوردستانی پێویسته‌ و هه‌ردووكیشیان بۆ ناوچه‌كه‌ پێویستن

Decrease font Enlarge font قەبارەی فۆنت
total views:    1244
image

هەڵبژاردنی سەرۆكایەتی چەند ڕۆژێك پێش ئێستای میسر، دانوستانەكانی بەغدای تایبەت بە پرسی ئەتۆمیی ئێران، توندوتیژی لە سووریادا بابەتی سەرەكیی ئەم چەند ڕۆژەی ڕابردووی میدیاكانی جیهان بوون.

ئەم گۆڕانكارییانەی سەرەوە بوونە هۆی ئەوەی میدیای جیهان بە گرنگییەوە باس لە پێشكەوتنێكی دیكەی ناو عێراق نەكات كە لە كاتی خۆیدا دەتوانێت گەورەترین كاریگەری لە سەر داهاتووی ڕۆژهەڵاتی ناوەڕاست هەبێت.

مەبەستم لە ڕێككەوتنی نێوان حكوومەتی هەرێمی كوردستان و حكوومەتی توركیایە بۆ دانانی ژمارەیەك بۆری نەوت بۆ مەبەستی گەیاندنی نەوت و گازی هەرێمی كوردستان بۆ توركیا و لەوێشەوە بۆ ناوچەكانی دیكەی جیهان.

پێویستە بەرپرسانی ئەمەریكایش زۆر بە وردی و بایەخەوە سەیری ئەم ڕێككەوتنە بكەن.

سوودوەرنەگرتن لە نەوت و غازی هەرێمی كوردستان
تاوه‌كو ئێستا حكوومەتی هەرێمی كوردستان نەیتوانیوە وەكو پێویست سوود لە سەروەت و سامانە سرووشتییەكەی هەرێمەكەی وەربگرێت، چونكە دەبێت نەوتی هەرێم لە ڕێی ئەو بۆریانەوە بنێرێتە دەرەوە كە لە ژێر كۆنترۆڵی حكوومەتی ناوەندیدان.

ناوەندی وەردەگرێت و زۆرجاریش ئەم بودجەیە بەشێوەیەكی ڕێك و پێك نادرێت.

ئەم شتانە وایانكردووە وەزارەتی نەوتی عێراق هەوڵ بدات پێگەی خۆی بەهێز بكات و لە بەرانبەریشدا كار لە سەر ئەوە بكات سازش بە بەرپرسانی هەرێمی كوردستان بكات، بە تایبەتی لە ئامادەكردن و دەركردنی یاسای نەوت و غازدا (كە تاوه‌كو ئێستایش دەرنەكراوە

یەكێك لەو شتانەی حكوومەتی عێراق لەم چوارچێوەیەدا جەختی لە سەر دەكاتەوە هەبوونی مافی ڤیتۆیە، بە تایبەتی بۆ ئەو كارانەی تایبەتن بە نەوت و غاز و حكوومەتی هەرێمی كوردستان دەیەوێت ئەنجامیان بدات.

حكوومەتی ناوەندی دەیەوێت لە ڕێگه‌ی هەبوونی ئەم مافی ڤیتۆیەوە توانای ئەوەی هەبێت دەستەڵاتی حكوومەتی هەرێم بۆ دەرهێنانی نەوت لە ناوچە جیاوازەكانی ژێر دەستەڵاتییدا سنووردار بكات و پاشانیش بتوانێت بڕیار لە سەر ئەوە بدات که ‌حكوومەتی هەرێم لەگەڵ چ كۆمپانیاییەكدا واژۆی تایبەت بە دەرهێنانی نەوت بكات و، لەگەڵ چ كۆمپانیایەكی دیكەدا نەیكات.

بێگومان حكوومەتی هەرێمی كوردستان نەچووەتە ژێر ئەو فشارانەوە و تاوه‌كو ئێستایش زیاتر لە 40 گرێبەستی تایبەت بە دەرهێنانی نەوتی واژۆ كردووە كە حكوومەتی ناوەندی خوازیاری سەركەوتنیان نەبووە، لەوانەیش گرێبەستكردن لەگەڵ كۆمپانیای “ئیكسن مۆبیل”ـدا لە كۆتایی ساڵی ڕابردوودا.

فشارە بەردەوامەكانی حكوومەتی ناوەندی
حكوومەتی ناوەندی لە بەرانبەر ئەم كارانەی حكوومەتی هەرێمدا بێ هەڵوێست نەبووە، بەڵكو هەر شتێكی كردووە كە توانیویەتی.

بۆ نموونە، بەرپرسانی بەغدا ڕێگه‌یان بەو كۆمپانیایانە نەداوە كە لە هەرێمی كوردستاندا خەریكی دەرهێنانی نەوتن بۆ ئەوەی لە كێڵگە نەوتییەكانی باشووری عێراقیش دەست بە كاری وەبەرهێنان لەو بوارەدا بكەن.

سەرەڕای ئەوەیش، ناردنی نەوتی هەرێمی كوردستان لە ڕێی بۆریە نەوتییە گشتییەكانی وڵاتەوە سنووردار كراوە. كاردانەوەی حكوومەتی ناوەندی گەییشتووەتە ئاستێكی وەها كە ئامادە نەبووە پارەی ئیش و كاری ئەو كۆمپانیایانە بدات كە لە هەرێمی كوردستاندا ئیشی خۆیان دەكەن.

ئەم هەنگاوەی دوایی حكوومەتی عێراقیش بووە هۆی ئەوەی بەرپرسانی حكوومەتی هەرێمی كوردستان بڕیار بدەن ناردنی نەوتی هەرێمەكەیان بۆ بازاڕەكانی دەرەوە ڕابگرن، كە پێشبینی دەكرێت تاوه‌كو ساڵی 2012 بگاتە نزیكەی 175 هەزار بەرمیل لە ڕۆژێكدا.

كورد عێراقێكی فیدراڵی و دیموكراسی ڕاستەقینەی دەوێت
بێگومان كێشەی نەوت بەشێكە لە كێشەیەكی زۆر گەورەتر كە خۆی لە سرووشتی دەوڵەتی نوێی عێراقدا دەبینێتەوە و تاوه‌كو ئێستایش چارە نەكراوە.

كوردەكان هیچ كاتێك ناتوانن چەوساندنەوەیان لە لایەن حكوومەتە یەك لە دوای یەكەكانی عێراقەوە فەرامۆش بكەن، هەربۆیەیش نایانەوێت جارێكی دیكە بوارە سەرەكییەكانی وەكو سیاسی و ئابووری و فیزیكییان لە لایەن بەغداوە بڕیاری لە سەر بدرێت.

كوردەكان لە ناخەوە تینوی سەربەخۆیین، بەڵام لە ساڵی 2003ـەوە ئامادەبوون لە چوارچێوەی عێراقێكی یەكگرتوودا بمێننەوە، بەڵام بە مەرجێك ئەو عێراقە بەڕاستی وڵاتێكی فیدراڵی بێت و دەستەڵاتی حكوومەتی ناوەندیش لە لایەن دەستووری وڵاتەوە گەرەنتی بكرێت.

ئەوان هەروەها جەختیان لە سەر ئەوەیش كردووەتەوە كە دەبێت هەر ئەو دەستوورە ڕێز لە ئۆتۆنۆمیی هەرێمی كوردستان بگرێت.

سەرەڕای ئەوەیش، كۆنترۆڵكردنی سامانە سرووشتییەكانی هەرێمەكە لە لایەن خودی حكوومەتی هەرێمی كوردستانەوە بەشێكی سەرەكی لە هەر جۆرە ڕێككەوتنێك پێك دەهێنێت.

(مالیكی) و قۆڕخكردنی دەستەڵات
بێگومان حكوومەتی ناوەندی تێڕوانینێكی دیكەی هەیە. عێراق لە سەردەمی (نووری مالیكی)ـدا بە ئاراستەیەك هەنگاوی هەڵگرتووە كە تیایدا ناوەند گەورەترین دەستەڵاتی هەبێت.

لە سەردەمی (مالیكی)ـدا شتەكان بەو شێوەیە دەبینرێن كە بەرپرسانی ئێستای وڵات دەیانەوێت حكوومەتی ناوەندی گەورەترین دەستەڵاتی سیاسی و ئابووری و ئاساییشی هەبێت.

(مالیكی) پێی وایە فیدراڵیزم نابێتە هۆكاری گەڕانەوەی ئارامی و ئاساییش بۆ وڵات، بەڵكو دەبێتە سەرچاوەی بێهێزی و فەوزا و پارچە پارچە بوون، بە جۆرێك كە باشترین نموونەی لوبنان بێت و خراپترینیشی یوگسلافیای پێشوو بێت.

بەرپرسانی عێراق پێیان وایە گرێبەستە نەوتییەكانی حكوومەتی ناوەندی خەنجەرێكن لە دڵی بەغدا دەدرێن، چونكە (بە تێڕوانینی بەرپرسانی عێراق) ئەم كارە ڕێزنەگرتنە لە دەستەڵاتی ناوەند و پاشانیش هەڵگرتنی هەنگاوە بۆ سەربەخۆیی كوردستان.

دەرئەنجامی ئەم كێشانە بە ڕوونی دەبینرێن. لەگەڵ كشانەوەی سوپای ئەمەریكایش لە عێراقدا كێشەكان قوڵتر بوونەوە

(مالیكی) دەستی بە قۆڕخكردنی دەستەڵات و بەهێزتربوونی پێگەی خۆی كرد و ئەمەیش لە لایەن كوردەكان و زۆرینەی دانیشتووانی عێراقەوە بە هەڕەشەیەكی مەترسیدار دادەنرێت.

(مالیكی) نەیارە سیاسییەكانی خۆی دەكاتە ئامانج و چەندین تۆمەتیان دەداتە پاڵ و هەوڵی دەستگیركردنیان دەدات، لەوانەیش جێگری سەرۆككۆماری وڵات.

زیاتر لە 18 مانگە حكوومەتی نوێی عێراق دامەزراوە، بەڵام تاوه‌كو ئێستا (مالیكی) ڕێزی لە ڕێككەوتننامەكانی تایبەت بە شەراكەتی نیشتمانی نەگرتووە و هەر خۆی وەزارەتەكانی بەرگریی و ناوخۆ و هەواڵگری بەڕێوە دەبات.

ئەو هەروەها دەستی بە سیاسیكردنی دادگاكانی عێراق و بانکی ناوەندی وڵات كردووە.

(مالیكی) لە هەمان ماوەیشدا دەستی بە پڕچەككردنی سوپا كردووە، بێگومان خۆی سەرۆكایەتیی ئەم سوپایەیش دەكات. (مالیكی) لە سەر ئەنجامدانی چەندین شتی دیكەیش بەردەوامە كە بە هیچ شێوەیەك لە لایەن كوردەكان و زۆرینەی دانیشتووانی دیكەی عێراقەوە قەبووڵ ناكرێت.

دانانی بۆری نەوتی نێوان كوردستان و توركیا
ڕێككەوتنی نێوان حكوومەتی هەرێمی كوردستان و حكوومەتی توركیا بۆ دانانی ژمارەیەك بۆری نەوت بۆ گواستنەوەی نەوتی هەرێمەكە بۆ توركیا و لەوێشەوە بۆ جیهان لەم كاتە دا دێت.

وەزیری سامانە سرووشتییەكانی حكوومەتی هەرێمی كوردستان لە كۆنفرانسی چەند ڕۆژێك پێش ئێستای تایبەت بە وزەدا لە هەولێر ڕایگەیاند كە تاوه‌كو پێش كۆتایی ساڵی 2013 دەكرێت زیاتر لە 1 ملیۆن بەرمیل نەوتی هەرێم ڕەوانەی بەندەرەكان و پاڵاوگەكانی توركیا بكرێت.

بێگومان هەمان جۆرە پلان بۆ گازی هەرێمەكەیش هەیە. داهاتی ئەم نەوتەیش ڕاستەوخۆ دێتەوە لای حكوومەتی هەرێمی كوردستان و پشكێكی گونجاو و تەواوی لێ وەردەگیرێت و ئەوی دیكەی ڕەوانەی بەغدا دەكرێت بۆ خەزێنەی ناوەندی عێراق.

ئەم هەنگاوە گرنگی خۆی هەیە، چونكە لە حاڵەتی ئێستادا كوردەكان تەنیا ڕێژەی 17% بودجەی گشتی عێراق وەردەگرن- كە ئەمساڵ نزیكەی 10 ملیار دۆلار بوو. ئەگەر بێتو نرخی نەوت وەكو ئێستا لە بازاڕەكانی جیهاندا بەرز بێت، ئەوا دانانی ئەو بۆریە نەوتانەیش لە لایەن حكوومەتی هەرێمەوە بۆ گواستنەوەی نەوتەكەی بۆ توركیا دەبێتە هۆی زیادبوونی داهاتی هەرێمەكە، بەلایەنی كەمەوە بۆ سێ هێندەی بڕی ئێستای.

كاتێكیش ئەم هەنگاوە كەوتە بواری جێبەجێكردنەوە، ئیدی پشت بەستنی كورد بە حكوومەتی ناوەندی كۆتایی پێ دێت، تەنانەت ئەو پشت بەستنەی ئێستای دەگۆڕدرێت بە مۆدێلێك كە دەكرێت یارمەتیدەر بێت بۆ سەربەخۆیی هەرێمی كوردستانیش.

توركیایش، كوردستانی پێویستە
بێگومان ئەم هەنگاوانەیش بۆ توركیا گرنگی خۆیان هەیە. بەرپرسانی توركیا ماوەی چەندین دەیەیە كێشەیان لەگەڵ كوردەكانی وڵاتەكەیاندا هەیە، لەوانەیش شەڕی نێوان سوپا و شەڕوانانی پارتیی كرێكارانی كوردستان.

بەرپرسانی توركیا بۆ ماوەی چەندین ساڵ سیاسەتێكی توند و دژومنكارانەیشیان بەرانبەر بە هەرێمی كوردستان پەیڕەو دەكرد، چونكە ترسی ئەوەیان هەبوو دەستەڵاتی كورد لەو هەرێمە ببێتە هاندەرێك بۆ ئەوەی كوردەكانی توركیایش داوای مافی خۆیان بكەن و تەنانەت توركیا یەكپارچەیی خۆی لە دەست بدات.

ئێستا ئەو سیاسەت و تێڕوانینە گۆڕانكاریی بەسەردا هاتووە و لە چەند ساڵی ڕابردوویشدا پەیوەندییەكی بەهێز لە نێوان حكوومەتی توركیا و حكوومەتی هەرێمی كوردستاندا دروست بووە.

ئێستا ژمارەیەكی زۆر كۆمپانیای توركیا لە هەرێمی كوردستاندا ئیش دەكەن.

پاشانیش، پەیوەندییەكی بازرگانی بەهێز لە نێوان عێراق و توركیادا هەیە و ڕێگه‌ی ئەم پەیوەندییەیش هەرێمی كوردستانە كە بازاڕێكی گەورەیە بۆ كەل و پەلی توركیا.

ئەگەر بێتو پەیوەندی بواری وزەیش لە نێوان هەرێمی كوردستان و توركیادا دەست پێ بكات، ئەوا حكوومەتی هەرێمی كوردستان دەبێتە گەورەترین و گرنگترین هاوپەیمانی ئابووری توركیا.

توركیا پێویستی بە وزەیە
حكوومەتی توركیا گرنگییەكی زۆر بەم ڕۆڵ و پێگە بەهێزەی حكوومەتی هەرێمی كوردستان دەدات.

توركیا لە چەند ساڵی ڕابردوودا لە بواری ئابوورییەوە پێشكەوتنێكی گەورەی بە دەست هێناوە و بۆ ئەوەی ئەم پێشكەوتنەیش بەردەوام بێت ئەوا پێویستی بە وزە هەیە.

حكوومەتی ئەو وڵاتە لە كاتی ئێستادا بۆ مەبەستی بە دەست هێنانی وزە بەشێوەیەكی سەرەكیی پشت بە بەرهەمی وزەی ڕووسیا و ئێران دەبەستێت، بەڵام ئەمەیش جێی متمانە نییە، چونكە ئەگەر سزا ئابوورییەكانی سەر ئێران بەردەوام بن، ئەوا توركیا ناچارە لە ژێر فشارەكانی ئەمەریكایشدا بێت پشت بەستنی خۆی بە ئێران كەم بكاتەوە.

ئەگەریش بەرهەمی نەوت و گازی هەرێمی كوردستان لە ڕێی توركیاوە تێپەڕ بێت بۆ جیهانی دەرەوە، ئەوا بەرپرسانی ئەنقەرە كێشەی نەبوونی وزەیان نامێنێت و پاشانیش وڵاتەكەیان دەبێتە ڕێگه‌یەكی گەورەی گەیەنەری وزە بە ئەورووپا. بە كورتی دەتوانین بڵێین پەیوەندی نێوان حكوومەتی هەرێمی كوردستان و توركیا سوودێكی زۆریشی بۆ توركیا دەبێت.

چارەکردنی كێشەی كورد لە توركیادا
ئەم پەیوەندییەی نێوان حكوومەتی هەرێمی كوردستان و حكوومەتی توركیا گرنگییەكی زۆریشی لە بواری ئاساییشەوە دەبێت.

تاوه‌كو چەند ساڵێك پێش ئێستا، بەرپرسانی توركیا وەكو بەشێك لە سەرچاوەی كێشەی پەكەكە سەیری هەرێمی كوردستانیان دەكرد، ئەوەیش بەهۆی مانەوەی ئەو چەكدارانە لە بەرزاییەكانی هەرێمەكەدا.

ئێستا ئەو تێڕوانینە گۆڕاوە و بەرپرسانی توركیا وەكو چارە سەیری ئەو هەرێمە دەكەن.

ئەوان لەو ڕاستییە تێگەییشتوون كە حكوومەتی هەرێمی كوردستان هاندەری دۆزینەوەی ڕێگه‌چارەیەكی سیاسیانەیە بۆ كێشەی كورد لە توركیادا بە جۆرێك كە دەوڵەتی توركیا بە دانیشتووانە كوردەكەی ئاشت بكاتەوە.

ڕكابەرایەتی نێوان ئێران و توركیا
خاڵی دووەمی پەیوەندیدار بە بواری ئاساییشەوە تایبەتە بە كۆماری ئیسلامیی ئێران و ئەو ڕكابەرایەتییە هەرێمایەتییەی لە نێوان توركیا و ئێراندا بەرچاو دەكەوێت و ڕۆژ لە دوای ڕۆژیش لە زیادبووندایە.

ئەم ڕكابەرایەتییە لە تەنگژەی ئێستای سووریادا بەڕوونی بەرچاو دەكەوێت، چونكە ئێران پشتگیریی لە بەرپرسانی حكوومەت دەكات و توركیایش دژایەتییان دەكات

شەڕی ساردی نێوان ئێران و توركیا لە عێراقیش دەبینرێت، بە تایبەتی لە پاش تۆمەتباركردنی جێگری سەرۆككۆماری عێراق (تاریق هاشمی) بە چەندین تاوان

بەرپرسانی توركیا پێیان وایە حكوومەتی عێراق بە تەواوی كەوتووەتە ژێر كۆنترۆڵ و كاریگەریی كۆماری ئیسلامیی ئێرانەوە. سەرەڕای ئەوەیش، ئەم بەهارە گرژی تاكەكەسی نێوان (مالیكی) و (ئەردۆغان) گەییشتە ئاستێكی وەها كە سووتاندنی ئاڵای توركیای لە بەسرە لێكەوتەوە.

لەم هەل و مەرجەیشدا، كوردستانێكی ئارام بەلای بەرپرسانی توركیاوە گرنگە، بە تایبەتی كاتێك زۆرینەی دانیشتووانی ئەو هەرێمە سوننەیە و دانیشتووانەكە و بەرپرسەكانیشی دۆستایەتیی توركیایان لە دۆستایەتی ئێران بەلاوە پەسەندترە.

كات زۆر شت ئاسایی دەكاتەوە
كات بڕیار لەسەر ئەوە دەدات ئەم پەیوەندییە بەهێزانەی نێوان حكوومەتی هەرێمی كوردستان و حكوومەتی توركیا تا چ ئاستێك دەگەن

توێژەرەوانی سیاسی لە توركیا و ئەمەریكا پێیان وایە حكوومەتی توركیا دەیەوێت پەیوەندییەكی ئابووری و ستراتیژی زۆر بەهێزی لەگەڵ حكوومەتی هەرێمی كوردستاندا هەبێت، بەڵام نایەوێت ئەو هەرێمە ببێتە وڵاتێكی سەربەخۆ.

پێدەچێت بەو جۆرە بێت، بەڵام دەبێت ڕەچاوی ئەوەیش بكەین که‌ دەكرێت ئەو سیاسەتەی توركیایش (بۆ ڕێگەنەدان بە سەربەخۆیی كوردستان) گۆڕانكاریی بەسەردا بێت، چونكە ژمارەیەكی زۆر كەم توێژەرەوە هەبوون پێشبینی ئەوەیان دەكرد پەیوەندی نێوان حكوومەتی توركیا و حكوومەتی هەرێم بەم جۆرە گەرم و گوڕی تێ بكەوێت.

سەردانی ساڵی 2011ـی (ئەردۆغان) بۆ هەولێر و شەكانەوەی ئاڵای توركیا لە تەنیشت ئاڵای كوردستاندا شتێكی پڕ بایەخ و گرنگ بوو.

شێوازی پێشوازیكردنیش لە سەرۆكی هەرێمی كوردستان (مەسعوود بارزانی) و سەرۆكی حكوومەتی هەرێمی كوردستان (نێچیرڤان بارزانی) لە چەند هەفتەی ڕابردوویشدا لە لایەن بەرپرسانی توركیاوە واتا و گرنگی خۆی هەبوو.

هەربۆیەیش دەڵێین ڕاگەیاندنی دانانی بیرە نەوت بۆ گواستنەوەی نەوتی هەرێمی كوردستان بۆ ئەورووپا لە ڕێی توركیاوە بڕیارێكی كت و پڕ نەبووە و وەڵامێكی خێرا و پەلەیش نەبووە بۆ تەنگژەكانی ئەم دواییەی عێراق، لەوانەیش قوڵبوونەوەی كێشەكانی نێوان حكوومەتی ناوەندی و حكوومەتی هەرێمی كوردستان.

بە پێچەوانەوە، بڕیاری دانانی ئەو بۆریە نەوتانە بەرهەمی چەندین ساڵ قسەكردن و دانوستان بووە و خودی (ئەردۆغان)ـیش ڕۆڵی گەورەی لەم دانوستان و سیاسەتەدا گێڕاوە.

هۆكاری ئەم پەیوەندییە بەهێزەی نێوان حكوومەتی هەرێمی كوردستان و حكوومەتی توركیا هەر شتێك بێت زۆر گرنگ نییە، شتی گرنگ ئەوەیە كە ئەم پەیوەندییە دەتوانێت گۆڕانكاریی ستراتیژی گرنگ لە باشووری خۆرئاوای ئاسیادا لەگەڵ خۆیدا بهێنێت.

دەبێت ئەمەریكایش لە گۆڕانكارییەكان تێ بگات
پێویستە سیاسەتمەدارانی ئەمەریكایش ئاوڕێكی جیددی لەم پەیوەندییەی نێوان توركیا و حكوومەتی هەرێمی كوردستان بدەنەوە، چونكە ئەم پەیوەندییە كاریگەریی گەورەی لەسەر بارودۆخی عێراق و ناوچەكە بەشێوەیەكی گشتی دەبێت.

ئەم پەیوەندییە ڕۆڵی گرنگیش لە پاراستنی بەرژەوەندییەكانی ئەمەریكادا لە ناوچەكەدا دەگێڕێت.

ئەوەی جێی نیگەرانییە ئەوەیە كە ئیدارەی (ئۆباما) كەمتر ئاگاداری ئەم پێشكەوتنانەیە و زیاتر وەكو بینەرێك سەیری ئەم یارییانە دەكات كە لە ناوچەكەدا دەكرێن.

پێویستە واشنتۆن تێگەییشتنێكی باشتری بۆ سیاسەتی توركیا بە ئاراستەی كوردستان و عێراق هەبێت و تەواوی هەوڵەكانیشی بخاتە گەڕ بۆ ئەوەی ئەویش لەم پرۆژە گرنگەدا بەشدار بێت.

ئەگەر عێراقێكی فیدراڵی و دیموكراسی و یەكپارچە لە بەرژەوەندی ئەمەریكادایە، ئەوا پێویستە بەرپرسانی كۆشكی سپی ڕۆڵێكی گرنگ لە چارەكردنی كێشە سیاسییەكانی نێوان حكوومەتی بەغدا و حكوومەتی هەرێمی كوردستاندا بگێڕن، لەوانەیش لە دەركردنی یاسای تایبەت بە نەوت و غازدا.

پێدەچێت بەرپرسانی ئیدارەی (ئۆباما) پێیان وابێت باشترە سیاسەتمەدارانی عێراق خۆیان كێشەكانی وڵاتەكەیان چارە بكەن، بەڵام ڕاستییەكەی بەجۆرێكی دیكەیە و وڵاتانی دیكەی ناوچەكە سوود لەم بۆشاییە وەردەگرن بۆ پاراستنی بەرژەوەندییەكانی خۆیان و ئەمەیش كاریگەری لەسەر داهاتووی عێراق و نەخشەی رۆژهەڵاتی ناوەڕاست هەیە. هەربۆیەیش پێویستە ئەمەریكا زۆر زوو بێتە ناو ئەم یارییەوە.

سەرچاوە: گۆڤاری “فۆرین پۆڵیسی” ئەمەریكی.
نووسەر ڕاوێژكاری ئاسایشی نەتەوەیی جێگیری سەرۆكی پێشووی ئەمەریكا (دیك چینی)بووە.

 

ئاماده‌كردن و وه‌رگێڕانی: عه‌لی حه‌سه‌ن زه‌ڵمی / سایتی هەولێر