کورد چه‌وا ژ بۆ هه‌لبژارتنێن پارله‌مه‌نا عێراقێ خوه‌ ئاماده‌ دکن ؟

Decrease font Enlarge font قەبارەی فۆنت
total views:    2027
image

فاخر به‌رواری

وه‌ک تێته‌ زانین بڕیاره‌ د 16-01-2010 هه‌لبژارتنێن گشتی ل سه‌رانسه‌ری عێراقا فیدراڵ و کوردستان ژی د ناڤدا بێنه‌ ئه‌نجام دان.هه‌لبه‌ت هه‌ر ژ نوکه‌، ئالیێن عێراقی ژ عه‌ره‌بێن شیعه‌،حه‌تا یێن سوونی بگره‌ دخوازن ده‌ستهه‌لاتا عێراقی ب ده‌ست بێخن،ژ به‌ر هندێ هه‌ولێن ئالیان د به‌رده‌وامن و چه‌ند لیسته‌یه‌ک ب پێشه‌نگیا هنده‌ک ئالیێن ب باندۆر ل عێراقێ هاتنه‌ دۆرستکرن،و ئه‌ڤ لایه‌نانه‌ چه‌ندین د وارێن بیر و هزرێن خوه‌ و ئایدۆلوژی و رێبازێن خوه‌ دۆری هه‌ڤن لێ دیسان ژ بۆ گرنتیکرنا ده‌ستهه‌لاتێ هه‌ڤ دگرن.

بێگومان دڤیا بۆ هه‌تا نوکه‌ ل سه‌ر ئاستێ کوردستانێ هه‌وله‌کا مه‌زن ژ ئالێێن پارتیێن ده‌ستهه‌لاتدار ڤه‌ هاتبانا، دان ژ بۆ دۆرستکرنا لیسته‌ک کوردستانی یان یه‌ک هه‌لوێستیا گه‌لێ کوردستانێ ل سه‌ر بنگه‌هێن نه‌ته‌وه‌یی و دۆر ژ وان پرسگرێکێن د ناڤا پارت و ئالیێن سیاسی دا هه‌ین کو سه‌رچاوه‌ه‌یا وێ ژ ده‌ستهه‌لات و گه‌نده‌لیێ تێت.

ب دیتنا من ئه‌گه‌ر کورد دیسان قۆربانیێ د ڤێ رێکێ دا نه‌ده‌ن و ژ بۆ به‌رژه‌وه‌ندیێن نه‌ته‌وه‌یی خوه‌ نێزیکی یه‌ک نه‌که‌ن وێ ده‌مێ دێ ئاسایشا نه‌ته‌وه‌یی که‌ڤیته‌ د مه‌ترسیێ دا،چونکه‌ هه‌تا نوکه‌ پرسگرێکێن د نێڤبه‌را هه‌ولێر و به‌غدا دا چاره‌سه‌ر نه‌بوینه‌،و ئه‌و ده‌ڤه‌رێن هاتینه‌ داگێرکرن ژ کوردستانێ نه‌ ڤه‌گه‌ریاینه‌ و دێ ده‌ستهه‌لاتداریا کوردان ل عێراقێ و کوردستانێ، لاوازبیت،ژ ئالیێ دیڤه‌ ده‌وله‌تێن کوردستان داگێرکری ب تایبه‌تی تورکیا ئیرۆ بۆ جاره‌کادی ده‌ستوورنامه‌یا، ده‌رباسکرنا سنووری ل په‌رله‌مانێ تورکیا ب رێکا ده‌نگان هاته‌ په‌ژراندن، و ئه‌و مه‌ترسیه‌کا به‌رده‌وامه‌ ل سه‌ر باشوورێ کوردستانێ،مه‌ترسیا دی ژی کو دێ ئاسایشا نه‌ته‌وه‌یی ب یه‌کجاری که‌ڤیته‌ ژێر گه‌فان، ئه‌وه‌یه‌ ده‌ما ئه‌م دبینین هنده‌ک ئالی ل سه‌ر ناڤێ دیموکراسیه‌تێ رێکێ د ده‌نه‌ خوه‌ و ل گه‌ل هنده‌ک ئالیێن عه‌ره‌ب د بنه‌ هه‌ڤپه‌یمان بۆ میناک برا، کوردێن فه‌یلی مافێن خوه‌ د کوردستانێ دا نابینن و خوه‌ ژ نه‌ته‌وه‌یا خوه‌ ب دۆر ئێخست،و که‌فتنه‌ د به‌ره‌یێ ئۆلی دا و دبنه‌ پالپشتێن سه‌رکه‌فتنا عه‌ره‌بێن ئه‌و ب سالان بێ ناسنامه‌ هێلاین و ئه‌نفال و جینوساید کرین و بێ ج هو وار هێلاین.

ئه‌گه‌ر گه‌لێ کوردستانێ ب گشتی و پارت و ئالی و رێکخستنێن کوردستانی ب تایبه‌تی ده‌ست ژ به‌رژه‌وه‌ندیێن ئالیێن خوه‌ و ناوچه‌یێن خوه‌ به‌رنه‌ده‌ن و خوه‌ نه‌که‌نه‌ قوربانا نه‌ته‌وه‌یا خوه‌ دێ ده‌ستکه‌فتیێن نه‌ته‌وه‌یی پشتی هه‌لبژارتنان که‌ڤنه‌ د مه‌ترسیێ دا چونکه‌،وه‌ک خۆیا ل ده‌ف مه‌ ته‌ڤان پشتی سالا 2003 و شووندا کورد یه‌کگرتی بۆن و هێزا وان یا سیاسی و له‌شکه‌ری و  دیپلوماسی و ئابووری د ڤی واریدا گه‌له‌ک ژ یا عه‌ره‌بێن ناڤه‌راست و باشوورێ عێراقێ مه‌ستر بۆ،و رۆلێ کوردان د پراکتیکێ دا د ئاڤاکرنا عێراقا نوو دا خوه‌یا دکر.و ژ به‌ر ڤێ یه‌کرێزی و ژیربۆنا وان کاریان هنده‌ک گاڤان به‌ره‌و چاره‌سه‌ریا دۆزا کورد ل باشوورێ وه‌لاتی و عێراقێ باڤێژن و باندۆرا ئه‌رێنی ل پارچه‌یێن دی یێن کوردستانێ ژی دکر.لێ دیسان ژی نه‌بونه‌ به‌رسڤ ژ بۆ چاره‌سه‌رکرنا، هه‌مۆ پرسگرێکان و ب تایبه‌تی پرسگرێکا مادده‌یا  140 یا کو ئه‌ز ژێرا دبێژم ده‌ڤه‌رێن ژ کوردستانێ هاتین داگێرکرن.

ئیجار پرسیار ئه‌وه‌ گه‌لۆ کورد دێ چه‌وا خوه‌ ژ بۆ هه‌لبژارتنێن سالا بێت ئاماده‌که‌ن؟هه‌لبه‌ت هه‌ر کوردێن سالا 2005 نه‌ لێ ب ئاوایه‌کێ دی ئاماده‌کاریان ژ بۆ ڤێ پرۆسه‌سێ دکه‌ن،وه‌ک خوه‌یا یه‌ ل ده‌ف مه‌ ته‌ڤان پارتیا ده‌موکراتا کوردستانێ و یه‌کتیا نشتیمانیا کوردستانێ،رێکفتن نامه‌یا ستراتژیک د ناڤبه‌را وان ده‌ هه‌یه‌ و بێگومان ئه‌و دێ د یه‌ک به‌ره‌یدا جهێ خوه‌ گرن لێ ب دیتنان من یا گرنکتر ئه‌وه‌ وێ چه‌وا ئه‌ڤ هێزه‌ بکارن ته‌ڤ کوردان د به‌ره‌یه‌کی دا کۆم که‌ن؟ئه‌وژی ب هزرا من دڤێت پارتی، و یه‌کتی د ڤی واریدا ب ئاوایه‌کی ئاکتیفانه‌ کار بکه‌ن،وه‌ک چه‌وا ل سه‌رده‌مێن شۆڕه‌شا چه‌کداری قۆربانی دان،و د تێکۆشینه‌کا به‌رده‌وام دا بۆن.د ڤێت ب هه‌مان گیانێ لێبورین و کوردپه‌روه‌ریێ کار بکه‌ن و رێک و زه‌مینه‌یێ ژ بۆ ته‌ڤایا ئالی و رێکخستنێن کوردستانی خوه‌ش بکه‌ن،دا کو ئه‌وژی جهێ خوه‌ د به‌ره‌یێ وان دا بگرن،ئه‌گه‌ر ئه‌ڤه‌ پێک نه‌هێت و هه‌ر پارته‌ک ب سه‌رێ خوه‌ بیت. و ژ ئالیی دیڤه‌ژی کوردێن موسلمان و ئێزدی و شه‌به‌ک و فه‌یلی و کرستیان و بادینی و سۆرانی و هه‌وره‌مانی و کاکه‌یی، و هنده‌ک هۆز ژی ( عه‌شیره‌تا ) ژی ناڤی خوه‌ ل کۆمسیۆنا بلندا هه‌لبژارتنان توومار کریه‌ وێ ب سه‌رێ خوه‌ یان دناڤ هنده‌ک لیستێن عه‌ره‌بان دا بکه‌ڤنه‌ د هه‌لبژارتناندا.ئه‌ڤ چه‌ندا هه‌ژی د که‌ڤیته‌ د خانا خزمه‌تکرنا داگێرکه‌رێن کوردستانی دا،و ب چ ئاوای خزمه‌تا نه‌ته‌وایه‌تی ناکه‌ت،پێدڤیه‌ ته‌ڤایا گه‌ل و نه‌ته‌وه‌ و پارت و ئالی و بزاڤ و رێکخستیێن سڤیل و ئالیێن ئۆلی ژی د ناڤدا،ل ژێر پیرۆزترین ناڤ ئه‌وژی ناڤێ کوردستانێ یه‌، و ب گووتاره‌کا سیاسی و نشتیمانی و نه‌ته‌وایه‌تی بکه‌ڤنه‌ د پرۆسه‌سا هه‌لبژارتنێن 16-01-2010 دا کو بشێن ب باندۆر و هێزا خوه‌ به‌غدا نه‌چار بکه‌ن، و ل سه‌ر ماسه‌یا دانوستان و گفتۆگویان بێی کو خوینه‌کا مه‌زن بێته‌ رژاندن ته‌ڤ پرسگرێکان چاره‌سه‌ر بکه‌ن.