رۆژ باش نه‌ یا موسلمانا یه‌ یا کافرانه‌؟

Decrease font Enlarge font قەبارەی فۆنت
total views:    1309
image

فاخر به‌رواری

پشتی کو چه‌ند ساله‌کان ئه‌ز ژی وه‌کی چه‌ندین کوردان دووری وه‌لاتێ خۆ بوویم ژ به‌ر هنده‌ک سه‌ده‌مێن تایبه‌ت،لێ چوو ده‌مان ژ قادا کوردپه‌روه‌ی و خه‌بات و تێکۆشینێ ب دوور نه‌که‌فتم، و به‌لکوو بارێ سه‌رملێن مه‌ د گه‌له‌ک واران دا گرانتر لێهات، و ئه‌گه‌ر مرۆڤی ل ناڤا وه‌لاتی هزر د ئازادیا پارچه‌کا وه‌لاتێ خۆدا کربیت و خه‌بات بۆ کربیت لێ ل ده‌رڤه‌یی وه‌لاتی گه‌له‌ک مه‌ستر ته‌ماشه‌یی پرسگرێکا کورد ب گشتی کریه‌،و هه‌ولدایه‌ ل گۆر شیانێن خوو و درێکا کارێ خۆدا خزمه‌تا ته‌ڤایا نه‌ته‌وه‌یا کورد و کوردستانیان بکه‌ت.

هه‌لبه‌ت داخوازا هه‌ر کورده‌کی ئه‌وبوو کو ره‌نج و خه‌باتا ب سالان یا گه‌لێ مه‌ ئه‌وا ژ بۆ ئازادی و مافێن خوه‌یێن ره‌وا،ب هه‌روه‌ نه‌چن.سوپاس بۆ یه‌زدانێ مه‌زن و خوینا شه‌هیدان و یا پارێزڤانێن گه‌ل و وه‌لاتی پێشمه‌رگه‌یێن جان گۆری، ئازادی و سه‌ربه‌ستی ب ده‌ستڤه‌ هاتن و رۆژ بۆ رۆژێ جاره‌نڤێسێ نه‌ته‌وه‌و گه‌لێ کوردستانێ رۆنی دبیت و ئه‌لندا پاشه‌رۆژا وێ یاگه‌شه‌.

بێگۆمان ده‌ستکه‌فتیێن ئازادیێ گه‌له‌کن و د هه‌ر واره‌کیدا پێشکه‌فتنێن مه‌زن د باژێرێ دهۆکێ دا چێبوونه‌ هه‌ر ژ ئاڤه‌دانی و جوانکرنا تاخ و گۆلانێن ناڤا باژێری و خه‌ملاندنا وان ب باقچه‌ و دار و گولێن ره‌نگاو ره‌نگ و نووژه‌نکرنا فه‌رمانگه‌هێن میری،و رێکخستنکرنا سیسته‌مێ ئیداری جهێ دلخۆشی و سه‌ربلنداهیا هه‌ر کوردپه‌روه‌ره‌کینه‌.

لێ ده‌ما مرۆڤ پێدڤی دوورستکرنا هنده‌ک به‌لگه‌نامه‌ و ناسنامه‌،و هه‌ر کاره‌کێ دکه‌ڤیته‌ د فه‌رمانگه‌ه و رێڤه‌بریاندا،دێ راستی هنده‌ک که‌سێن رێڤه‌به‌ر و کارمه‌ند هێی ژ به‌ر دانوستانا وان یا دگه‌ل که‌سێن داخوازکه‌ر،و وه‌لاتیان،ب رۆهنی خوه‌یا دبیت کو نه ‌ژ هه‌ژی وێ به‌رپرساتیێ نه‌،و دگه‌ل هندێ ژی دێ ژ به‌ر وان بنپێکرنێن یاسایی ئه‌وێن ژ ئالیێ هه‌ردوو لایان ڤه‌ تێنه‌ کرن،و   ب چاڤێن خۆ دبینی، هه‌ستێ مرۆڤی پێ بریندبیت.

هه‌لبه‌ت وه‌ک من ئاماژه‌ پێکری،من دخواست ئه‌ز ژی سودێ ژ چێکرنا هنده‌ک به‌لگێن پێدڤی بکه‌م،ژ به‌ر وێ چه‌ندێ من هه‌ولدا ئه‌ز به‌لگه‌ناما ده‌ستیردانا هاژوتنێ،شووفێریێ، کو ده‌ما وێ یا یاسای ب سه‌رچووبوو ب گهورم،و من د ڤی چارچوڤیدا، هه‌رده‌م دخواست پێگریێ ب رێنمایێن یاسای بکه‌م،و چوو سه‌رپێچیان نه‌که‌م،لێ ژ به‌رکوو ئالیێن کارمه‌ند و داخوازکه‌ر،گه‌له‌ک جاران تووشی شاشیان بوون،و گه‌له‌ک سه‌رگێژی و ئاسته‌نگ بۆ من ژی چێبوون و ئه‌ز نه‌چاری وێ یه‌کێ بووم کو رێکێن نه‌ یاسای بگرمه‌ به‌ر،پێخه‌مه‌ت دوورستکرنا به‌لگه‌ناما خۆ.

سه‌ره‌رایی ڤێ چه‌ندێ ژی مخابن  د دانوستانا من یا دگه‌ل کارمه‌ند و رێڤه‌به‌ران، ئه‌ز راستی گه‌له‌ک په‌یڤێن بیانی و ب تایبه‌تی عه‌ره‌بی بووم.وه‌ک سه‌یدا،مۆدیر،مووه‌زف،ئه‌هله‌ن وه‌سه‌هله‌ن،.و هتد....

لێ د قۆناغا داویێدا، ل رێڤه‌به‌ریا پۆلیسێ، هاتن و چوونێ ل ته‌ناهی،راستی پله‌داره‌کی پۆلیسێ  هاتن و چوونێ هاتم و من گۆتێ هێژا رۆژ باش،ل به‌رسڤدا گۆت رۆژ باش نه‌یا مۆسلمانا یه‌ یا کافرانه‌،؟و ب وی ئاوای ئه‌ز به‌رسڤا ته‌ ناده‌م، و گۆت دڤێت ب عه‌ره‌بی سلاڤ بکه‌ی،من ژی به‌رسڤا وی ب ڤیره‌نگی دا،ل جیهانێ چوو نه‌ته‌وه‌ و جڤاک ب ناڤێ کافر نینن،ئه‌ز ب خۆ ژی کورده‌کی ره‌سه‌نم،و ژ جڤاکا کوردێن ئێزدی مه‌.پشتی ڤێ چه‌ندێ ناڤبری بێ به‌رسڤ ما.لێ د پشترا ناسناما که‌سێ ئاماژه‌ پێهاتی کرن بۆ من دیاربوو کو ژ مالباتێن شێخێن بامه‌رنێ یه‌.

د ڤێ خالێدا دخوازم نێرینا خۆ بینمه‌ زمان کو حه‌تا نووکه‌ ژی نرخێن ڤێ ئازادی و ته‌ناهیێ ل جه‌م هنده‌ک که‌سێن نه‌ به‌رپرسانه‌ کار دکه‌ن،نینه‌. چوونکه‌ ب  ته‌مه‌نێ ژیانا خۆ هه‌رده‌م د خزمه‌تا داگێرکه‌ران دا بوونه‌ و ئیرۆژی دڤێت ب دانوستانا خۆ دلسوژی و وه‌فاداریا خۆ ب رێکا نووکه‌ریێ بۆ بیانیان بده‌ن خوه‌یاکرن.